Rene Herde’ (AVP): Hamas bay bek na 2008

Den e reunion den Parlamento riba criminalidad, miembronan di MEP a boga pa hiba Aruba bay bek na e situacion di criminalidad y husticia cu tabatin na 2008. E remarcanan aki a causa hilaridad cerca algun y spanto cerca otronan, pasobra hopi hende ta corda ta con malo e situacion di criminalidad y husticia tabata den e añanan di gobernacion di MEP, segun Rene Herde’.

 

HAMAS BAY BEK ATRAS

E fraccion di AVP mester a bay den pasado pa corda e fraccion di MEP con malo e situacion di criminalidad tabata bou gobernacion di MEP. Aruba tabata aparece riba internacional di FATF pasobra Gobierno di MEP no tabata cumpli cu niun di e reglanan pa combati crimen organisa y financiamento di terorismo.

MEP tabata contra pa introduci e reglanan aki na Aruba pasobra segun MEP nan lo ta malo pa economia di Aruba. Ora AVP a drenta Gobierno a sigura pa introduci y ehecuta tur e leynan contra criminalidad. Na mes un momento Gobierno y Parlamento di AVP a pone economia crece atrobe di e punto negativo di -15% na 2009 pa 4% e aña aki, sr. Herde’ tas plica.

 

Na 2008 a sali publicacion cu a mustra cu Gobierno di MEP tabata purba stroba husticia di haci su trabou na Aruba y con Gobierno di MEP tabata purba uza husticia pa persigui contrincantenan politico y hende cu no tabata di acuerdo cu nan.

Na 2007 a sali den publicidad un serie di caso cu armanan di candela den posicion di miembronan di MEP cerca di Gobierno di MEP. E cantidad di atraco, hortamento y crimennan cu arma na 2007 tabata e esun mas halto den historia di Aruba.

Na 2008 adictonan ambulante (“chollernan”) tabata doño di centro di Playa y Gobierno di MEP mes tabata huur edificio di “friends and family” pa tene e adictonan den centro di ciudad.

Na 2007, Gobierno Hulandes a obliga e Minister di Husticia di MEP pa desmantela e radar di Aruba y laga e radar di Warda Costa di Reino so traha, pasobra tabatin masha duda den e forma cu e radar di Aruba tabata wordo uza.

E sentimento di desconfiansa cu tabatin den Gobierno y den gruponan di hende cu e Gobierno a hinca den husticia, tabatin pueblo masha preocupa pa nan seguridad na cas, riba caya, den bario y unda cu nan por bay. Pa AVP e mero idea di bay bek na e situacion aki di e añanan 2005-2009 ta totalmente inaceptabel, sr. Herde’ ta duna di conoce.

 

Den un voz e fraccion di AVP a bisa, “Hamas nos lo laga Aruba bay bek na e situacion di 2005-2009. Hamas! A cambia e maneho di husticia. A inverti hopi mas den Polis y den husticia.

E casonan di atraco cu tin awor aki tin nos preocupa. P’esey nos ta sigui actua pa stop esaki y tene Aruba trankilo y sigur. Pero laga Aruba bay bek na e situacion di 2008, hamas! Ta padilanti so nos por bay!”

Top