Rene Herdé (AVP): Kita tur obstaculo pa miho enseñansa

“Educacion t’e solucion”

 

“Pa nos hisa e calidad di nos enseñansa y percura cu nos enseñansa ta sirbi tur mucha y hoben te maximo di nan capacidad, mester kita tur obstaculo cu ainda tin den enseñansa y den comunidad. Den e ultimo añanan a haci hopi di esey. Awor mester bolbe dirigi e maneho riba renobacion structural di enseñansa, sin desvia di e metanan cu proyectonan cosmetico.”

 

Asina Rene Herdé, educador di profesion, a bisa siman pasa den reuda di prensa. Cu esey e kier mustra cu e condicionnan cu a crea e ultimo añanan den enseñansa, ta permiti pa renoba enseñansa manera nos pais y nos alumnonan tin mester awor y pa futuro.

 

2009-2017

Na fin di 2009 tabatin hopi mucha den edad di bay scol cu no por a bay scol, pasobra no tabatin luga na scol. Nos ta corda p. e. e borchi cu tabata para na Maria College na Playa, cu tabatin scirbi pa studiantenan y nan mayornan bay busca scol otro caminda.

 

Tambe e cantidad di mucha cu mester a core den bus di un parti pa otro pa haya un scol pa bay. Mucho scol tabata den mal estado. Nan a wordo neglisha! Ta pa e motibo aki mester a inverti asina hopi den drecha y traha scol den ultimo ocho aña. A mehora e condicionnan fisico pa un bon enseñansa.

 

Na 2010 a re-introduci e INDEXERING di salario di maestronan di scol cu a wordo kita pa 8 aña door di gobierno di MEP. Asina a cuminsa mehora e salario di maestronan di scol. Awor ta preparando un ley hunto cu sindicato di maestro di scol SIMAR pa kita e obstaculonan cu tin den e sistema di salario y carera di maestronan di scol.

 

Segun Rene Herdé, “Un di e instrumentonan pa mehora calidad di enseñansa ta pa sigui hisa e nivel profesional di maestronan di scol y hunto cu esey mehora e pago na maestronan di scol. Drechamento di scolnan y mehoracion di e posicion di maestronan ta condicionnan necesario pa mehora calidad di enseñansa.”

 

“Dor di crea e miho condicion fisico y financiero aki, a kita un obstaculo pa renobacion di enseñansa mes. Awor cu e mayoria di scolnan ta bek den bon condicion y e plannan pa restructura e posicion di maestronan di scol ta cla, mester haci e renobacion structural di nos enseñansa e curason di e maneho di enseñansa. Pa presente y futuro di nos pais y nos alumnonan esaki ta indispensabel”, Rene Herdé a conclui.

Top