Rene Herdé: MANEHO DI ENTRADA TA CURASON DI MANEHO SOCIO ECONOMICO

E maneho pa stimula y mehora entrada (salario, pensioen of beneficio) ta bisa con partidonan ta wak reparticion di entrada den nos pais. E ta bisa tambe ki balor partidonan ta duna na forsa di compra di ciudadanonan. E programa di partidonan politico di oposicion, ta bisa sinembargo poco rib’e tema aki. E programa di partido AVP al contrario ta masha explicito rib’e tema importante aki. AVP ta propone e siguiente accionnan di maneho di entrada den e siguiente Gobierno di AVP, segun Rene Herdé.

 

ENTRADANAN MAS ABOU

E gruponan mas vulnerabel den nos comunidad, pensionadonan cu pensioen chikito, hende cu ta haya onderstand of un salario minimo, semper a conta cu un atencion special di AVP. Como partido christian democrata AVP ta haya cu Gobierno tin un responsabilidad special pa e grupo grandi aki di nos comunidad, sr. Herdé ta splica.

 

Pa e gruponan cu entrada mas abou aki AVP ta propone den e siguiente gobernacion e. o. mehoracion di nan entrada cu e siguiente puntonan di maneho:

  1. Redobla e onderstand pa hende cu un handicap;
  2. Haci posibel pa hende cu un handicap bou di e e dad di 18 aña, tambe por haya onderstand. Awor aki nan mester warda te ora nan cumpli 18 aña. AVP ta bay canbia e ley pa haci’e posibel;
  3. Famianan cu un entrada abou lo haya un beneficio di Gobierno pa yuda paga e huur di cas. E huurtoeslag aki tambe lo conta si e cas ta un cas priva.

 

REDUCI PRIMA DI AZV

Bou Gobiernonan di AVP a introduci e “reparatie toeslag” y a aumenta asina e pensioen di behez dos biaha. Pa e grupo grandi di pensionadon AVP ta bay reduci e prima cu pensionadonan tin cu paga pa nan seguro medico, sr. Herdé ta mustra.

 

FAMIANAN HOBEN

Tin un grupo grandi di hobennan cu ta caba na estudio, cuminsa traha y kier cuminsa un famia. Awor aki parti grandi di nan entrada ta bay na cubri gastonan regular, na paga nan fiansa pa estudio y hipoteca di un cas. Nan merece un maneho di nan Gobierno, cu ta reconoce con duro nan ta traha y ta duna nan espacio financiero pa lanta nan famia.

 

Pa e grupo di famianan hoben aki AVP ta propone pa yuda e cu

  1. Miho un areglo pa paga nan fiansa di estudio bek. Den 10 aña por kita 10 mil florin for di nan entrada riba cua nan tin cu paga belasting;
  2. Ta bay aumenta e contribucion pa gastonan di educacion (schoolgeld);
  3. AVP ta bay introduci un arelgo pa famianan hoben paga costonan di scol y actividadnan educativo pa nan yiunan;
  4. Ta bay aumenta e garantia di Fondo di Garantia pa Vivienda, pa famianan hoben por yega na cumpra of traha nan cas mas lihe.

 

Cu e pakete di incentivonan fiscal y ayudo directo aki cu AVP ta propone, lo sigui yuda mehora forsa di compra pa famianan hoben, pa pensionadonan y pa famianan cu un entrada abou.

Di e forma aki nan por haci mas pa nan famia. AVP ta e unico partido cu ta atende e tema aki den forma integral y cu atencion pa tur grupo den comunidad. P’esey cu AVP di berdad tur hende ta bay PADILANTI! Sr. Herdé ta conclui.

Top