Rene Herde’ na lider di MEP: STOP DI GAÑA!

“E 12 miembro di AVP a aproba e aumento di castigo pa crimennan di abuso di mucha na 2012 di 8 pa 12 aña. Na 2014, fraccion di AVP a bolbe hinca den ley motibonan pa hisa e castigo aki na 16 aña. Kiermen cu ley awor aki ya ta duna e posibilidad pa duna castigonan hopi mas halto.

Ta Ministerio Publico y Corte no ta pidi of duna castigonan mas halto”, asina Rene Herde’ di e fraccion di AVP a declara.

 

Sinembargo, e lider di MEP ta sigui bisa cu ta pa motibo di AVP cu no ta duna castigonan mas halto. Rene Herde’ ta expresa lo contrario:

“No ta berdad! E lider di MEP mester stop di gaña! E sa masha bon cu Hueznan por duna hopi mas castigo awor caba segun e ley cu nos a aproba. Loke Hueznan por duna ta hopi mas halto cu e castigo di tres aña cu e lider di MEP a sugeri. Pa nos e ta mucho abou.

 

E daño cu e abuso di mucha ta causa ta hopi grandi. E ta un daño permanente den hopi caso.

E crimennan aki contra muchanan menor di edad y criaturanan indefenso merece hopi mas castigo. Ta p’esey nos a aumenta e castigo hopi mas.

 

Awor te 16 aña di castigo e Hueznan por duna den caso cu tin motibonan pa esey. No ta e ley ta e problema. Ta loke Ministerio Publico ta pidi y Hueznan ta duna ta e problema.

E lider di MEP sa esey masha bon. Pero en bes di yuda busca solucion, e kier purba saca probecho politico. Anto cu dolor di muchanan. Esta un berguensa”, sr. Herde’ a comenta.

 

SOLUCION

E solucion cu e lider di MEP a presenta tabata un ley pa castigo minimo di 3 aña. Pero nunca el a entrega e ley ey. Semper e ta bisa cu e no a haya contesta di Gobierno pa caba e ley.

 

Di acuerdo cu Rene Herde’, “Aki tambe e lider di MEP no ta papia berdad. El a haya contesta di Raad van Advies ya 6 aña pasa. El a haya contesta di Gobierno ya 5 aña pasa.

Kiermen cu si di berdad e kier a contribui cu algo, e por a caba e ley ey hopi aña pasa caba.

E no a haci esey!”

 

Rene Herde’ ta bisa cu e solucion no ta den un castigo minimo asina abou. Ministerio Publico y Corte por aplica e ley existente y duna castigonan hopi mas halto. Si e Hueznan sigui e liña di pensamento di Ministerio Publico di Hulanda (= richtlijnen) so caba nan lo duna castigonan mas halto. Si nan sigui e liñanan di guia di Europa nan ta yega na castigonan ainda mas halto!

 

Rene Herde’ ta comenta cu e lider di MEP sa tur esaki, pero ni su propio ley el a presenta.

“E lider di MEP no kier busca un solucion, pasobra e ora e no por sigui haci politica cu dolor di e muchanan y nan famia. E kier sigui hunga cu sentimientonan di hende pa purba saca probecho politico. Pero pa colmo e ta totalmente incorecto cu su informacion. E ta gaña!

Fraccion di AVP a bolbe pidi pa reuni cu Ministerio Publico y cu Hueznan pa sikiera nan splica pakico nan no ta duna castigonan mas pisa. Pero nan no kier reuni cu nos. Esaki tambe ta inaceptabel!”, sr. Herde’ a duna di conoce.

Top