Rene Herdé: Nada lo stop nos

“E noticia cu un miembro di nos partido den e funcion di Minister ta wordo sospecha di ta envolvi den cosnan contra ley, a cay manera un bom serca nos.

Nos no a wak niun prueba ainda y no ta na nos pa huzga niun hende. Pero nunca nos a pensa cu hasta un sospecho asina lo por bolbe sosode na Aruba, manera a sosode pa mucho hopi aña.

No na Aruba y sigur no di un miembro di nos organisacion politico.

Nos a traha mucho duro pa combati y preveni abuso di poder, corupcion y actonan ilicito dor di hende den funcionnan publico manera a sosode bou Gobierno anterior.

 

Nos sa mucho bon kico tur a sosode bou di Gobierno anterior y cuanto nos a haci pa sigura cu hamas e cosnan ilicito ey lo por bolbe sosode na Aruba.

Nos a traha mucho duro pa saca Aruba for di tur e diferente crisis y abismonan cu nos pais tabata aden na fin di 2009.

Ni un sospecho manera esaki no tin mag di sosode mas. No na Aruba y sigur no den AVP”, asina Rene Herdé di e fraccion di AVP a declara siman pasa.

 

NADA LO STOP NOS

Rene Herdé a sigui bisa cu normanan di integridad ta esencial y indispensabel pa gobernacion di nos pais.

“Nos (AVP) ta tene e normanan aki halto. Nan ta conta pa tur hende y den tur situacion. Pero tanten cu no presenta prueba, nos no por huzga tampoco.

Pesey nos ta contento cu a yega n’e acuerdo p’e Minister bay “non activo” den su funcion, tanten cu e investigacion ta anda.

Asina ta sigura cu Ministerio Publico por haci su trabou sin niun apariencia di intrevencion of estorbo. Mientrastanto tur trabou di goberna nos pais ta sigui. Nos a yega hopi leu den saca nos pais for di e multiple crisis cu MEP a bay laga nos pais aden”, segun Rene Herde.

 

E ultimo relato di e bishita di IMF di siman pasa ta prueba di esey. Nos ta wak un cantidad di asunto riba diferente tereno cu nos mester sigui traha riba dje.

En particular e creacion di un economia nobo, mas amplio y berde, cu e meta pa sigura Aruba mas stabilidad y mas oportunidad den futuro.

E generacion di Arubianonan den futuro mester sigui biba den un Aruba sigur y cu mas oportunidad pa trabou na nivel di nan estudio y nan esfuerso. Esey ta un di nos puntonan di focus principal. Awor cu nos a restaura y mehora e base economico compara cu loke e tabata prome cu 2009, nos por capitalisa y crea e ditres pilar economico. Pero nos mester actua awor y no perde tempo.

 

Tin hopi pa haci pa logra esey y nos ta bay haci’e. No tin nada pa kita nos atencion of stop nos. Ta nos responsabilidad y nos deseo pa pone nos pais n’e nivel economico, financiero y social, cu nunca prome nos a yega di logra.

Nos ta sumamente motiva dor di entre otro e raport di IMF y no tin nada pa stop nos awor, Rene Herdé a termina su comentario.

Top