Reparticion di carteranan di Gabinete Evelyn Wever-Croes I a keda cla – Intencion ta pa huramenta e Ministernan nobo diaranzon awor

Formacion di Gobierno nobo de facto a cuminsa dia 16 di october, mientras cu Gobernador a nombra Evelina Wever Croes como Formador dia 12 di october.

For di dia 16 di october a cuminsa cu e proceso pa duna Aruba un Gobierno nobo, cu tin sosten di 12 asiento den Parlamento.

 

E combersacionnan a cuminsa den oficina di Aruba Ports Authority, cu a conduci na firmamento di un acuerdo di gobernacion, na formacion di Ayo, sigui despues pa dia 1 di november cu firmamento di e programa di gobernacion.

Despues di esaki a sigui e proceso di reparticion di carteranan, loke sigur no a bay facil. Pasobra MEP kier atene su mes na 7 Ministerio, pero mirando cu POR ta haya 2 Minister y RED 1, e reparticion no ta cumpli cu resultado di eleccion, pa cual MEP kier mas Minister, pero con lo por bende esaki cu pueblo votador.

 

Bashando awa den biña a pone cu MEP a yega na 5 Minister, pero asina mes, e ta kedando crap pa un Gabinete di 8 Minister. Unabes cu a yega n’e nombernan di candidatonan, a sigui cu screening, cu maske a ser bisa di ta cla, no t’asina, ya cu Gobernador tin cu duna su ultimo palabra ainda.

E deseo ta p’e Gabinete nobo huramenta diarazon awor, den oranan di atardi, pero oficialmente ningun informacion a ser duna di esaki.

Si no ta diarazon, e lo por bira hasta diabierne atardi, segun observadornan.

 

E posibel candidatonan pa Minister ta: Prome Minister Evelyna Wever Croes, Minister di Finanza y Economia, Xiomara Ruiz Maduro, Minister di Utilidad, Telecomunicacion, Sector Primario, Transporte, Chris Romero, Minister di Turismo, Dangui Oduber y Minister pa Salubridad, y Refineria, Glenbert Croes.

Pa POR, Otmar Oduber lo haya Infrastructura y Medio Ambiente y mr. Andin Bikker, Minister di Husticia y finalmente RED, lo manda Rudy Lampe como Minister di Enseñanza y Deporte.

 

Minister Plenipotenciario lo bira mr. Ady Thijsen, mientras p’e funcion na Washington, no tin decision ainda, debi cu pa Minister Plenipotenciario na Merca, e mester forma parti di Embahada di Reino, y como ta Hulanda ta exigi cu e mester ta un persona cu diplomacia.

 

 

Leave a Reply

Top