Resultado final di Torneo International “Aruba Chess Challenge 2017”

Den e weekend cu ta tras di lomba, a tuma lugar den e Conference Room di La Cabana Beach Hotel & Casino, e di 12 edicion di nos prestigioso torneo di ahedres “Aruba Chess Challenge”.

 

E torneo aki, a wordo hunga den 3 categoria.

Un categoria Open, unda tur hungador di tur edad por participa.

Den e categoria aki, nos tawata tin participacion di Venezuela cu 4 hungador, di Corsou tambe cu 4 hungador. Di Aruba mes, a inscribi 8 hungador.

Remarcable ta cu di e 8 hungadornan aki, 3 ta hoben di 14 aña, cu por a hunga den e categoria U-18. Pero nan a scoge pa hunga den e grupo Open.

 

Den categoria U-18 pa hobennan bou 18 aña por participa.

Aki den tabata tin participacion di solamente hungadornan di Aruba.

Na principio tabata tin inscripcion di hungadornan di Corsou tambe, pero pa motivo di no por a haya vuelo pa Aruba, mester a retira for di e torneo aki.

Un total di 16 hungador a inscirbi den e categoria aki.

 

Un categoria U-12, pa nos muchanan bou 12 aña.

Akiden tabatin un participacion record di 37 persona.

 

Den e grupo Open y U-18, 7 rond a wordo hunga rib’e dianan 5, 6, 7 y 8 di october.

Campeon di Aruba Chess Challenge 2017, a bira un hungador di 16 aña di Venezuela, esta Mauricio Ramirez Gonzalez.

Mauricio a score 6 punto for di 7 partido y el a empata na promer lugar cu Jose Mora (tambe di Venezuela).

Mauricio a hunga cu hungadornan mas fuerte y a keda na promer lugar (a acumula mas punto di resistencia).

Na tercer lugar a termina un otro hoben di Venezuela Alejandro Colina di 21 aña.

Na di 4 lugar tabatin un empate entre 3 hungador: Amelia Hernandez di Venezuela, Jimmy Izijk di Corsou y Jose (Chelo) Pesqueira di Aruba.

Amelia cu pa promer biaha ta participa n’e torneo Aruba Chess Challenge, a termina na di 4 lugar dor cu e tabatin contrincantenan mas fuerte.

Na di 5 lugar, nos ta haya Jimmy Izijk di Corsou y na di 6 lugar Jose (Chelo) Pesqueira di Aruba.

 

Den e categoria U-18, a termina na promer lugar Eldrick Donata.

Eldrick a score  6 ½ punto for di 7 partido, empatando solamente 1 partido.

Na di dos lugar tabatin un empate entre Ethan de Lange y Ayden Dirks.

Ambos a score 5 punto for di 7 partido.

Ethan tabatin contrincante mas duro y a keda na segundo lugar.

Mihor hungador bou di 16 aña a bira Kellen van Deutekom.

Kellen a score 4 ½ punto for di 7.

Y mihor hungador bou di 14 aña a bira Ryan Rangel.

Ryan tambe a score 4 ½ punto, pero tabatin menos punto di resistencia.

 

Den categoria U-12, un total di 9 partido a wordo hunga entre e 37 participantenan.

Na promer lugar a termina Thamara Sagastegui.

Thamara a score 8 ½ punto for di 9 partido.

Segundo lugar a bay pa Manuel Christian  cu 7 ½ punto.

Na tercer lugar tabatin un empate entre Jeshua Mc Collum y Lesley Cielo. Ambos a score 6 ½ punto.

Jeshua a hunga cu hungadornan mas fuerte y a keda na tercer lugar.

Mihor hungador bou di 10 aña a bira Mary-Jane Bueno y mihor hungador bou di 8 aña a bira Patrick de Roo.

 

Nos por mira bek riba otro torneo di ahedres internacional masha existoso cu un participacion di 69 persona.

Leave a Reply

Top