Resultado play-off 40+ di Fedeveta a conduci cu Dakota Starzz, Bubali, Nacional y Caraval lo dicidi hende lo bay final

Diasabra na tereno di Caiquetio yena cu fanatico,Fedeveta a cuminsa e play-off 40+. E biaha aki a toca turno na Hooiberg Vets pa t’e organisador di e evento aki.

A cuminsa pa exactamente 5:30 cu entrada di refree y hungadornan compaña pa bandera di Aruba. Aa toca himno pa apertura di e play-off y ta start y mesora cu e nummer 4 di standing, e combinacion di Jong Aruba y United contra e nr. 5 di standing Bubali.

 

Wega a cuminsa bon balansa den un bunita hugada Carlos Villegas di Jong Aruba ta anota e prome goal. Net prome cu half-time riba un descuido di e defensa Noel “Juni” Semerel ta pasa piki e bala y ta topa su so cu keeper y ta empata e wega.

Den di dos mitar Jung Aruba/United tin un leve dominio, pero atrobe riba un descuido di e defensa Juni Semerel ta pasa piki y ta logra pasa e keeper pa duna Bubali e victoria di 2 pa 1.

 

Di 2 partido ta bay entre Nacional cu ta nr. 2 di standing contra nr. 7 cu ta SCA di Paradera. Aki por bisa cu Nacional a domina e partido y nan delantero peligros Arcesio “Checho” Gonzales no ta haci wega y ta anota 3 goal y asina duna Nacional e victoria mereci.

 

Di 3 partido ta bay entre e 2 rival grandi esta Dakota Starzz cu a caba nr. 1 di standing y Inter cu no ta den su mihor aña y ta caba na di 8 lugar. Den play-off tur cos ta cuminsa di nobo y un wega ta dicidi si bo por bira campeon di 40+.

Un wega cu bastante speed y sigur calidad halto unda tur dos ta ataca constante y asina e wega ta bay aden half-time 0-0. Ya tur hende a pensa esaki ta caba na penalty, pero aki e hungador Jair Oduber di Dakota a percura p’e unico goal di e partido y asina Dakota ta avansa p’e semi-final.

 

E di 4 partido ta bay entre e revelacion di 40+, esta Teachers United cu maneho nobo di Orlando y Wilmer a percura pa varios hungador nobo, mayoria di decendiente Peruano y casi full campeonato ta na nr. 1 di standing, pero riba ultimo dia ta perde di Dakota y ta bira nr. 3. Nan ta hunga contra un Caravel cu a caba na di 6 lugar.

Aki half-time ta bay aden 0-0.  Den di 10 minuut di wega e delantero di Caravel, Jamil Werleman ta haya un chens y no ta basila y ta haci e wega 1-0 pa Caravel. Net algo prome cu 12or di anochi den e hungador Rodolfo Casas di Caravel  ta bula bay halto y ta haya un eleboog patras di su cabez. El a haya un kap cu ta sangra y ta cay malo y pa seguridad ta prefera lage ey bou y yude cu ijs, mientras ta yama ambulance.

Pa 12:30 wega ta sigi, pero ya Teachers no por a haci nada mas pa empata e wega y asina e wega ta caba 1-0 pa Caravel.

 

Mester bisa cu Hooiberg Vets a percura pa un play-off bon organisa riba un di e veld na mas gusta p’e weganan di veterano. E siguente wega lo ta e semi final na unda Dakota Starzz lo topa Bubali y Nacional lo topa Caravel pa dicidi ken ta bay hunga final di 40+ 2017.

Aruba completo ta invita pa diasabra 16 september riba tereno di Caiquetio p’e semi-final 40+ di Fedeveta.

Leave a Reply

Top