Resúmen di actividadnan policial durante Parada di Carnaval Hubenil 2017

Awe nos ta duna un resumen di parti di Polis di Corsou, pa loke a pasa durante actividad di Parada di Carnaval Hubenil 2017.

 

DETENCION:

Alrededor di 18.10’or, Polis a detené un hòmber E.O.M. nacé na Aruba, 43 aña di edad riba tereno di un centro comercial situá den Roodeweg pa motibo cu el a menasá su ex casá cu morto. Na momento di su detencion e sospechoso tabatin un cuchiú den su poder.

Polis a confiscá e cuchiú y a transportá e sospechoso pa Warda di Polis pa mas investigacion, miéntras e dama a haci keho di menasa contra e hòmber aki.

Riba òrdo di un Fiscal auxiliar, e sospechoso a keda encarcelá pa mas investigacion

 

Alrededor di 19.30’or, Polis a nota cu tabatin un bringamento entre tres dama riba Weg naar Welgelegen.

Ora Polis a bay n’e sitio pa duna asistencia, un hòmber cu tabata n’e sitio, J.J.J. nacé na Còrsou, 25 aña di edad a ofendé e Polisnan.

Na momento cu e Polisnan a bay detené e hòmber sospechoso aki, el a resistí aresto. E sospechoso aki a keda detené y a transporte pa Warda di Polis.

A presentá e sospechoso dilanti di un Fiscal auxiliar. Despues cu a interogá e sospechoso a laga e sospechoso den libertad y a dun’é un dagvaarding cu fecha p’e presentá den Corte.

 

VEHÍCULONAN CU A FALTA CU REGLA

A transportá 4 vehículo cu tabata mal pará òf cu tabata obstaculisá tráfico.

Esaki ta trece un situacion di peliger especialmente ora e instancianan cu tin cu duna asistencia urgente nos por pasa bay.

A tou e vehículonan aki cu takelwagen y hiba nan Coney Island. Despues cu chofer di e vehículonan aki a paga e takelwagen y a haña un boet, nan por a bay cu nan vehículo.

 

OTRO CASONAN

Den un cas bandoná den Roodeweg a constatá un cantidad remarcabel di abeha. Esey a pone cu mester a para e marcha pa un periodo relativamente largo.

Despues cu a manda yama un IMKE (criador di abeha) y cu el a wak e situacion y a spùit un tiki, e marcha a continuá.

 

Na Arubastraat, desconocírnan a kita/destruí e material cu tabatin poni eynan pa evitá cu vehículonan ta pasa bin aden. Polis a bay n’e sitio y a remediá e situacion.

 

Na Hamelbergweg tabatin un sofá cant’i caminda cu un cantidad di carpata riba dje. GGD a bay cu e banki aki.

Na diferente ocasion Polis mester a taha mayornan cu pa motibo cu tabatin muchanan menor di edad riba òf mei-mei di e dranghèk. .

Na múltiple ocasion a nota cu público tabata hisa e dranghèk y habri esaki pa sea pasa òf para riba caya.

Nos ta suplicá un y tur pa no haci esaki mas y haci uso di e portanan cu tin presente y sigui òrdo di e bewakernan y Polis mesora.

 

 

Top