Reunion cu Ministerio Publico y Minister di Husticia no a trece nada nobo dilanti

Ayera mainta e Comision di Husticia di Parlamento, a reuni cu Minister di Husticia, mr. drs. Arthur Dowers y su consehero hunto cu Fiscal Deutekom di Ministerio Publico pa trata di haya mas claridad riba e maneho di Ministerio Publico pa loke ta castigonan p’esnan cu ta haci nan mes culpabel di abuso sexual contra menornan di edad.

 

E reunion a wordo presidi pa mr. Desiree de Sousa Croes y a conta cu presencia di 11 miembro di fraccion di AVP, hasta esnan cu no ta forma parti di e Comision di Husticia, mientras cu fraccion di MEP a wordo representa pa Besaril y Ady Thijssen.

Andin Bikker tambe a atende e reunion aki den como miembro di Democracia Real.

Mucho cos nobo no a bin dilanti den e reunion aki, caminda un biaha mas Minister di Husticia, Dowers a duna informacion cu el a duna dos siman pasa caba den un ‘bijeenkomst’ na Parlamento, pero e biaha aki e reunion ta net algun dia despues cu autoridadnan policial a pone man riba un grupo grandi di sospechoso cu a comete atraco den diferente bario y riba diferente negoshi.

 

Principalmente a punto cu pa cual a yama e reunion aki, tabata pa haya un bista riba e maneho di Ministerio Publico pa loke ta casonan di abuso sexual contra muchanan, cu na opinion general den comunidad, no ta ser atendi cu man duro cu tanto pueblo ta sclamando pa algun tempo caba.

Ayera mainta Minister y Fiscal Deutekom a mustra cu e maneho ta diferencia den tur caso y tin diferente aspecto cu mester tuma na consideracion den un tipo di caso asina.

 

A papia tambe riba e posibilidad pa bin c’un castigo minimo den e tipo di casonan aki, pero aki Ministerio Publico a mustra cu ta un situacion sumamente delicado y cu cualkier delito menor cu normalmente lo ricibi un castigo adecuado cu loke a tuma lugar, e sospechoso lo wordo someti na un castigo mucho mas pisa manera cu esaki ta ser exigi cu e castigo minimo.

 

Na final di e reunion por conclui cu e reunion no a trece mucha claridad riba e maneho di Ministerio Publico, pero si a mustra cu ta keda n’e instancia aki pa duna mas informacion na comunidad riba e maneho cu nan ta hibando pa cu e casonan serio aki.

Top