Reunion publico riba Minister Paul Croes a confirma diferencia grandi den partidonan politico

Pa: Victor (Toko) Winklaar

Ayera mainta Parlamento a trata un reunion yama pa fraccion di MEP y fraccion di PDR riba e desaroyonan relaciona cu Minister Paul Croes, pero cu a converti su mes, manera tabata di spera, den un reunion sin sentido y perdemento di tempo formal di tanto Parlamento, como di parti di Gobierno.

Loke mas a resalta den e reunion aki, ta cu politicamente tin un diferencia grandi n’e momentonan aki, entre e partido den Gobierno, esta AVP y su otro rivalnan politico cu ta tratando na uza e tipo di reunionnan aki, pa trata di saca probecho politico.

 

Sinembargo disertacionnan cu a wordo presenta tabata sin contenido, tabata sin nificacion y sin balor algun pa loke t’e caso di Minister Paul Croes, y pa gran parti e atakenan contra miembronan di fraccion mayoritario, contra di principalmente e Presidente di Parlamento, Mervin Wyatt Croes, kende a para fuerte contra di un avalancha di insultonan serio, den cual Xiomara Ruiz Maduro a resalta totalmente.

E reunion manera tabata di spera no por a trece ningun claridad den e desaroyonan relaciona cu Minister Paul Croes, pero si a ser converti den un tipo di atake politico caminda ya for di momento cu e prome orador, Evelyn Wever Croes a inicia cu su disertacion, ya caba tur hende tabata sa den ki direccion e reunion lo continua.

 

E insulto principal cu e lider di oposicion a dirigi den direccion di Minister Presidente Mike Eman ta ora cu e lider di MEP a cataloga Premier pa un “shouro” mustrando un arogancia increibel pa un rival cu sigur politicamente ta mas grandi y mas popular cu su persona.

Durante di e reunion e expresionnan di Evelyn a bira mas serio y mas pisa e.o. papiando di falta di hombresa, falta di curashi, hungando un wega politico den e reunion aki, cu simplemente no por produci ningun bentaha politico p’e pensamento aki di e lider di fraccion di MEP.

 

Hopi expresion politico cu a tuma lugar, hasta tabata masha comico, tabatin falta di seriedad y mas cu tur cos, a confirma cu algun miembro di Parlamento no ta serio den nan trabou.

E.o. tin cu menciona cu e miembro independiente, Marisol Lopez Tromp, dado momento durante di su disertacion a mustra entre otro cu ta for di ‘un aña’ pasa lo a solicita un reunion na Presidente di Parlamento y cu no a wordo otorga.

Aki e miembro independiente a lubida por completo cu si su persona ta menciona e periodo di un aña pasa, ta Marisol mes tabata Presidente di Parlamento durante di e periodo aki cu su persona a menciona cu e lo a pidi un reunion.

 

Diferente otro argumento cu a bin dilanti di parti di miembronan di oposicion, tabata basa mas tanto riba un tipo di propaganda politico cu den un reunion manera esun di ayera mainta, simplemente no tabata na su lugar.

Mientras cu mayoria di miembronan di oposicion tabata insisti cu nan no kier mete cu investigacion di e caso aki, cu e trabou di Ministerio Publico, ta mas cu claro e ora cu tur loke a resta pa haci ta weganan politico dirigi contra di Minister di Husticia, mr. drs. Arthur Dowers y principalmente Minister Presidente Mike Eman.

 

 

A trata di tur forma pa plak un decision incorecto na un supuesto decision di Conseho di Minister riba e decision pa Minister Paul Croes bira inactivo y asina habri caminda pa Ministerio Publico haci su trabou sin ningun tipo of indicacion di metemento den e proceso aki.

Insultonan tabata skeiro ayera den Parlamento y practicamente por conclui cu e duda cu a existi for di momento cu a haci un peticion p’e reunion aki riba e meta tras di esaki, a wordo confirma caminda 90% di e discusionnan tabata riba asuntonan politico.

 

Sinembargo loke sin duda por wordo conclui despues di e prome dia di reunion aki, ta un hecho concreto y sigur, esta cu e diferencia politico, e distancia politico entre e partido den Gobierno na e momentonan aki, esta AVP y e otro fraccionnan politico manera MEP y PDR pa loke a keda di esaki, ta mas grandi cu nunca.

No tin duda den esey ya cu e forma di algun miembro di oposicion a hiba nan disertacion, tabata muestra bon cla cu nan falta di contenido politico pa asumi responsabilidad di un pais cu ta pasando den un desaroyo asina grandi manera t’e caso den ultimo 8 aña.

Na ningun momento por a mira un solo argumento riba un vision diferente, riba un mentalidad politico superior na loke t’e caso cu e partido den Gobierno n’e momentonan aki y ta mas cu claro cu esaki ta refleha bek den comunidad, cerca e pueblo votador.

 

A keda confirma cu un lider politico no ta mustra su grandeza a base di con duro e por grita of cuanto insulto e por lansa den direccion di rivalnan politico, pero den un caracter cu mester ta un bon ehempel pa comunidad, cu respet  hasta pa rivalnan politico.

Top