Parlamentarionan Andin Bikker y Marisol Lopez-Tromp a entrega peticion pa reunion publico Referente caso entama pa SETAR N.V. na Merca

Gobierno ta haya dividendo di companianan estatal di pais Aruba cual ingresonan ta incorpora den Presupeusto di nos Pais.

Si tin menos ganashi den un compania estatal pa cualkier motibo, esaki tin como consecuencia cu pais Aruba ta haya menos entrada anual riba su presupuesto, of cu tin menos espacio pa rebaha prijsnan.

 

Segun Andin Bikker y Marisol Lopez Tromp den un comunicado, ta fresco den nos memoria e caso di WEB N.V. caminda bou responsablidad di Minister Mike de Meza a bay over na “hedging”, marando e compania na prijsnan di fuel oil haltisimo te cu fin di 2016.

E decision ey tabatin como consecuencia cu pueblo no por a gosa di prijsnan mas abou di awa y coriente ora cu prijsnan di crudo a baha te bou di 30 dolar.

 

Mirando awor cu a bin resulta cu tin un caso a wordo entama na Merca pa compania estatal SETAR N.V. pa purba recupera sumanan astronomico cu a bay perdi pa mas cu 10 aňa, ta deber di Parlamento pa pidi Gobierno y e Ministernan policamente responsabel splicacion riba e tema. Sigur mirando cu Parlamento no a wordo informa dor di Gobierno.

Gobierno mester aclarea p.e. desde ki tempo e tabata sa di tematica y dicon no a informa Parlamento y tambe referente e “checks and balances”, dus sistemanan di control cual obviamente mester wordo revisa pa evita cu algo asina por ripiti.

 

Den luz di esaki Parlamentarionan Andin Bikker y Marisol Lopez-Tromp a entrega e siman aki un peticion na Presidente di Parlamento pa yama un reunion publico cu e Ministernan responsabel por bin duna splicacion na Parlamento riba e tema.

 

Top