Richard Arends: “Resultadonan ta confirma pronosticonan economico pa aña 2017”

“E proyeccion nan economico como tambe presupuestario cu nos a anticipa tabata hopi favorable. Awe Banco Central di Aruba ta confirma esaki,” asina minister di Asuntonan Economico y Comunicacion y alaves miembro di Parlamento, Sr. Richard Arends a declara. E crecemento economico pa e aña aki ta wordo proyecta na 3.4% cu inversionan grandi den sector priva y publico cu ta suma casi Afl 1 biyon di florin como impulso grandi.

 

“Inicio di e rehabilitacion di e refineria, obviamente ta trece mas actividad economico rond di nos isla,” minister Arends a sigui splika. Nos ta wak den e prome cuartal un aumento substancial den importacion di metal y makinaria. “Segun un estudio di AIB a proyecta cu pa 2017 e contribucion di e reapartura di CITGO na nos economia lo ta alrededor di Afl. 280 miyon, esaki ta casi 6% di nos GDP.” Door di e inversionan den calidad di nos sector turistico, Aruba a sa di mehora su posicion competitivo y e prome cuartal di 2017 ta mustra cu no solamente e cantidad di bishitante a aumenta, excluyendo e mercado venezolano, pero e placa cu e turista ta gasta na Aruba tambe a aumenta cu 3.5%, como tambe e entradanan pa cada camber disponible a subi cu casi 7%.

 

Pa forma e fundeshi pa diversifica nos economia, Gabinete Mike Eman a ehecuta un plan di inversion amplio riba tereno di infrastructura, areanan publico como tambe energia. “De e resultadonan di e prome cuartal di 2017 nos ta wak e efectonan di e iniciativanan aki. Riba tereno energetico nos por corda cu e tarifanan di coriente a reduci cu 14% na januari 2017 como resultado di e inversionan den nos companianan di utilidad pa menhora nan eficiencia, mas penetracion di fuentanan renobable. “E maneho energetico cu Gabinete Mike Eman a hiba durante ultimo añanan por wordo considera como inversionan den poder di compra di nos ciudadanonan como tambe un reduccion di e gastonan di hasi negoshi,” Minister Arends a splika. “A logra reduci tambe e tasa di inflacion y aña 2017 no ta un excepcion.”

 

Awe nos ta testigo di un waf di container ultramoderno na Barcadera; obranan infrastructural di mas grandi cu nos a yega di conoce den e ultimo 30 añanan manera e Green Corridor y Watty Vos Boulevard;  un hospital state-of-the-art cu ta forma parti di un economia di conocemento. “E efectonan economico di esakinan ta bisto caba den e prome cuartal di 2017,” minister Arends a confirma. “Ainda nos ta spera e capitalisacion riba e oportunidadnan di actividadnan nobo den e areanan rond di nos refineria cu awor nos por usa atrobe pa industrianan limpi, como tambe e area cla pa wordo desaroya banda di e terminal di pasahero na e waf di Oranjestad.”

 

E titular di Asuntonan Economico a termina bisando cu economia ta hopi sensitivo pa cambio drastico. Sinembargo e ta hopi satisfecho cu e resultadonan di e prome cuartal di su cargo como mandatario. “Gobierno mester t’ey pa facilita: e oportunuidadnan nos dilanti t’ey. Mi tin e pleno confianza cu lo logra e metanan economico y financiero pa aña 2017 manera nos a anticipa,” segun Minister Arends.

Leave a Reply

Top