Rick Ross anuncia como atraccion principal pa Flip Flop Festival dia 1 di april awor na Aruba

Aruba por a tuma nota cu e aña aki Flip Flop Festival (maart 31, april 1 y april 2 2017) a anuncia algun artista cu a cay hopi na agrado manera Morgan Heritage y Konshens.

Sinembargo diamars ultimo durante un rueda di prensa a anuncia un di e atraccionan principal di e festival cu t’e famoso “Rick Ross” di Miami.

 

Rick Ross ta conoci pa ta un di e exponentenan mas grandi di e mundo di Rap/HipHop y actualmente como un artista cu ta figura regularmente den Top 40. Un di su exitonan mas grandi ta “Huslin”.

Recientemente e tabata nomina pa un “Grammy Award” pa su colaboracion cu Skrillex.

Otro colaboracionan cu el a haci ta cu e.o Jay-Z, Drake, Kanye West, Erykah Badu, John Legend, Chris Brown, T.I. y Future.

Otro artistanan internacional cu a wordo anuncia ta for di Hulanda Shermanology, for di New York Dj Cre8 y for di Sint Maarten Dj Outkast.

Pa loke t’e atraccionan local lo conta cu Tsunami, Jeon & Friends, Mystical Connection, Dj Vibes, Yeimy, Renzo M, Nutzbeatz, 101, Phattunez, Whiteboy, Big Rig y Devin,

Tur e artistanan aki lo presenta durante 3 dia di festival. Diabierna dia 31 di maart lo tin e fiesta di apertura den Emotions Nightclub cu atraccion principal Shermanology (EDM).

Diasabra dia 1 di april na Bushiri Beach Arena e atraccionan manera Morgan Heritage, Konshens y Rick Ross lo ta riba stage.

Diadomingo dia 2 di april na Renaissance Marina Pool Deck/Blue Bar lo tin un exclusive Chill Down Pool Party cu diferente Dj Local y algun sorpresa!

Tur Super Early Bird ticket a caba dialuna atardi sinembargo e Early Bird Tickets ta obtenibel awor caba. Si acaso kier atende tur tres dia di e evento mester cumpra sea un Single VIP ticket (Seccion Standing) cu ta inclui un banchi (aceso) pa tur tres dia of un Mesa di VIP (Mesa di 6 persona).

E carchinan ta obtenibel na Chill Logo Store situa den Renaissance Market Place dilanti Seaport Cinemas (Open 3 pm – 9 pm),Citgo Palm Beach, Citgo Boulevard, Citgo Santa Cruz y Citgo Essoville.

Pa cumpra mesa por haci esaki solamente n’e Chill Logo Store of yama 594-4704.

Top