Robin-Ann Didder, Chemisch Analist: Aruba den un situacion delicado financieramente, pero tambe den un situacion debil di nos flora y fauna

Ta un realidad cu nos medio ambiente ta den un situacion critico mescos cu e finansa di Aruba.  Te ainda e situacion di parkietenbos e Gobierno a demostra cu no tin un solucion p’e.

Sinembargo, Partido POR den Gobierno si tin su experticionan con pa atende cu e situacion na dump na parkietenbos.

 

Segun Robin-Ann Didder, number 14 lista di POR, tambe nos flora y fauna ta bayendo atras, pero partido POR tin un plan specifico  pa restaura esaki . Prome cu tur cos nos mester cuminsa na re educa comunidad y nos muchanan, bin cu programanan na cas y tambe na scol con ta separa sushi y kico ta e importancia di esaki pa nan mes un salud.

 

E mashin na dump ta un mashin hopi bieu, pero tampoco no tabata na su luga cu Gobierno a djis laga e problema aki un banda unda cu e mashin no por draai optimal pa por minimalisa e situacion malo cu tin riba parkietenbos.

Na final ta pueblo mester paga pa un mashin para pornada cu por a trece un diferencia grandi na momento cu e ta traha, pero e Gobierno actual a opta pa no pone prioridad rib’e situacion di dump y no a percura pa a trece expertonan pa atende cu e situacion.

 

Awo cu partido POR drenta Gobierno lo percura pa educa comunidad p’asina conhuntamente soluciona e problema cu tin actualmente. Ta hopi importante pa pueblo siña parti nan sushi nan, mescos cu ta wordo haci caba rond mundo e. o. Hulanda.

Pa varios aña caba na Hulanda nan ta separa nan sushinan unda cu tin un parti cu nan ta pone nan glas, corant y papel, sushi di berdura y fruta y tambe otro tipo di sushi cu tambe mester keda separa. Na Hulanda nan a duna cada uno un color y asina e mucha ta siña y re educa nan mayornan, e muchanan ta siña crece con pa stima su medio ambiente.

 

Loke cu tambe ta importante ta cu Hulanda ta haci control y na unda cu constata algo straño lo atende cu e doño di e cas, prome biaha ta haya un advertencia, pero pa e di dos biaha ya caba ta haya un boet. Na Aruba tambe ta importante pa haci control y tuma decisionnan na momento cu e doño di e cas no ta cumpli, esaki ta sigura continuacion di e regla stipula dor di Gobierno.

 

Segun Robin-Ann Didder, loke ta hopi tristo y doloroso ta e situacion di rosamento cu ta tumando luga actualmente, Aruba a perde hopi mata di kwihi cu a dura hopi aña pa crece.

Tambe a destrui un cantidad grandi neishi y parhanan cu tabata biba den e mondinan unda cu actualmente Gobierno kier bin cu nan droom proyecto cu ta un proyecto cu a hinca Aruba den un situacion delicado tanto financieramente, pero tambe den un situacion di naturalesa cu a hinca nos flora y fauna den un situacion debil.

 

Robin-Ann Didder ta haci un apelacion na comunidad pa cuminsa planta rond di cas, tambe ta kere cu fundacionnan cu tin diferente proyecto scoge un sitio na Aruba y bin cu un proyecto pa motiva nos muchanan tambe pa planta. Cada hoben of adulto plata un mata Aruba lo tin un cantidad grandi di matanan cu lo crece pa e siguiente generacion por disfruta di dje.

Nos mester corda cu nos tur rib’e pida baranca aki ta hala rosea limpi dor di mata, si no tin mata esaki por ta consecuencia pa nos salud.

Leave a Reply

Top