Robin-Ann Didder di Partido POR: E stabilidad emocional ta den bo man

E mundo social na Aruba tin mester di su atencion. Partido POR, e plataforma E Forsa Nobo, ta kere cu nos hendenan merece miho. Departamento di Asuntonan Social mester ta un departamento fuerte y cu mester di e sosten completo di Gobierno p’asina por duna e dedicacion na nos pueblo.

E topico di stabilidad emocional ta den bo man, y ta un topico cu nos mester para un rato keto y pensa si esaki ta e caso actualmente bou di nos hendenan, segun Robin Ann-Didder.

 

For di un investigacion partido POR a tuma nota cu na momento cu un empleado ta emocionalmente desbalansa e no por funciona y duna servicio di calidad. Si nos kier biba y sirbi nos pais manera nos ta biba y traha den un nivel di cinco strea nos tin cu pone nos hende central y inverti den nos personal. Esaki no solamente mester tuma luga den e sector priva pero tambe den sector publico, el a splica.

 

Mi persona, Robin-Ann Didder, ta sumamente contento di por a tuma nota cu tin algun compania den sector priva, cu mi a bishita, cu nan si ta dedica tempo na nan empleadonan.

Esaki ta di aplaudi. Cada aña e personal ta haya un charla  diferente pa asina duna oportunidad pa nan conocemento crece. Ta hopi cla cu pa e companianan aki  nan personal ta para central.

E compania ta inverti tempo den a empleadonan pa nan por haci nan trabou cu amor, Didder a continua bisando.

 

Den un charla riba e tema aki, e orador a splica kico ta e retonan cu cada empleado por haya su mes den dj’e. P. e. den, cuadro personal, di pareha y di educacion di bo yiu (nan).

Si na cas tin un desbalanse esaki por tin efecto riba su funcionamento na trabou. Tin hende na Aruba ta “burn-out” of ta depresivo.

Sintomanan di ”burn-out” ta e. o. cansancio di curpa, problema di concentracion, no gana di bay trabou, problema di drumimento, ansha, miedo, etc., ta algun sintoma di depresion.

Tur esaki ta haci un persona desfuncional y ta crea un situacion dificil p’e personalmente, Didder a mustra.

 

Problema di comunicacion, financiero, infidelidad y violacion entre pareha, por tin efecto no solamente riba bo pero tambe e personanan rond di bo, manera bo pareha, yiu (nan) e colega di trabou. Ta importante pa sa con bo ta bay om cu bo emocion, el a agrega.

 

Pa mi persona e parti di formacion personal den comunidad a bay atras, esaki ta loke cu mi persona, Robin-Ann Didder di partido POR, ta kere cu departamento di Asuntonan Social mester pone atencion riba dj’e. Aruba a bira un pais multicultural cu 11 tipo di famia cu diferente norma y balor. Den nos comunidad nos no a siña con pa anda cu relacion entre pareha, bo yiu of otro hende. Ta importante pa tuma bo tempo pa scoge bo pareha, Didder a enfatisa.

 

Bo tabata sa cu Aruba ta e number dos pais na mundo unda e divorcio ta halto? Kisas nos tin cu haci un sondeo y saca afo dicon e ta asina halto. Kisas nos tin cu evalua e siguiente puntonan manera e parti social, mental, profesional, familiar, financiero, fisico y spiritual. Si e puntonan aki ta den balans nos por contribui na un miho Aruba pa nos tur.

Como hende muhe, mama, maestro y awo como politico mi ta kere e ta sumamente importante pa duna mi aporte pa hisa nos nivel di hendenan, asina tambe ta crea generacionnan nobo stabil emocionalmente, ta locual Robin Ann-Didder a duna di conoce.

Top