Rocco Tjon, MBA di MEP: Decadencia Social y criminalidad

Ora analisa e estadisticanan di e cantidad di hobennan cu ta cera na KIA, nos ta wak un aumento alarmante den e ultimo añanan. Tambe por nota cu di e hobennan cu ta cera actualmente na KIA, e gran mayoria a yega di cay cera caba. Esaki por ta un indicacion cu nos sistema ta faya e hobennan aki, mirando cu e sistema no ta brinda nan un chens berdadero pa haya un di dos chens den comunidad, segun Rocco Tjon.

 

Pa frena e aumento di criminalidad, nos no mester enfoca solamente rib’e parti represivo pero mes importante ta pa enfoca rib’e parti di prevencion. Nos mester frena e desaroyo actual dor di analisa con nos por preveni hobennan pa cay den e gara di criminalidad.

Y tambe dor di optimalisa e integracion di esun nan cu a comete un fout caba, bek den nos comunidad.

 

Prome cu mi elabora mas rib’e problema aki y e posibel solucionnan, mi kier enfatisa, cu un condicion crucial pa frena e desaroyo aki ta cu tur stakeholders mester wordo ekipa cu e hermentnan necesario y tambe mester tin e personal necesario pa por asumi nan responsabilidad den frena e desaroyo actual, sr. Tjon a splica.

 

Investigacion

Un investigacion integral atraves di diferente entrevista y observacion, den diferente districto, ta mustra cu tin hopi hoben ta cana te den oranan laat riba caya sin supervision.

Locual tambe a resalta ta cu den e areanan caminda cu e situacionnan aki ta andando tin hopi benta di droga ta tuma lugar y tin hopi keho di e habitantenan mirando e molester cu e situacion aki ta ocasiona.

 

E peliger cu e situacion aki ta trece cu ne ta cu hobennan cu no ta pertenece na un “gang” ta mescla cu e hobennan cu si ta pertenece na un “gang”. E comportacion di esnan cu ta pertenece na un “gang” ta bay wordo mira como normal y asina e “gangnan” ta haya mas miembro tambe. P’esey ta importante pa sigura cu tin suficiente control na e “hot-spots” nan aki. E controlnan aki lo mester tuma lugar dor di Polis en combinacion cu partnernan strategico den comunidad.

 

Loke tambe ta preocupante ta cu e hobennan ta wak benta di droga nan dilanti y segun teorianan scientifico hobennan nan comportacion social ta wordo forma a traves di locual nan ta observa. Es decir e peliger ta real cu e hobennan ta haya uzo y benta di droga algo comun, sr. Tjon ta mustra.

 

Nucleo familiar

E situacion cu a wordo describi den e alinea anterior ta prueba di e importancia di e nucleo familiar. Negligencia familiar y violencia domestico dor di un adulto por conduci na comportacion anti-social cerca hobennan. Segun expertonan negligencia tin e consecuencianan mas negativo pa hobennan y ta conduci na hobennan cu ta carece di desaroya moral, norma y balornan y un structura positivo pa cu su desaroyo.

 

Resultado di e diferente entrevistanan cu a wordo haci cu stakeholders, manera departamento di Asuntonan Social, Reclassering, K.I.A. y K.P.A., ta indica cu mayoria organisacion no tin suficiente material y personal na nan disposicion pa por atende cu e situacion aki.

E situacion aki ta trece cu ne cu solamente hogarnan di famianan caminda e situacion financiero ta permiti, ayudo di un psicologo of trahador social por wordo busca.

 

Sinembargo, e ayudo profesional y duradero mester wordo ofreci na tur hoben cu tin e necesidad aki, no obstante e situacion financiero di nan hogar, sr. Tjon ta continua splicando.
Solucionnan

Partnernan strategico, mayornan, docentenan mester traha conforme un protocol p’asina preveni cu ayudo pa un hoben ta yega mucho laat. Tur instancia concerni lo mester acudi na un punto central p’asina delinea e cuido necesario n’e momento adecua.

Mester bin un sistema automatisa caminda tur dato ta wordo registra y comparti tambe cu otro, na tempo, p’asina e cuido ofreci ta di un calidad mucho mas halto.

Actualmente tin diferente instancia cu no tin un sistema automatisa pa registra y atende na un manera eficaz cu e hobennan cu mester di ayudo.

 

Ta importante tambe pa tur partner inverti den workshops y training rib’e tema aki pa nan personal p’asina nan por señala na tempo ora un hoben tin tendencia di desvia di e bon rumbo. Mes importante ta pa tin un comision permanente cu ta monitor e situacion y evalua pasonan cu ta wordo tuma pa frena y atende cu e diferente casonan, sr. Tjon ta remarca.

 

Por ultimo mester inova nos procesonan existente pa nan bira mucho mas flexibel caminda ta garantisa cu tin profesionalnan disponibel pa atende cu nos hobennan cu mester di guia y opvang. E realidad di nos mundo dinamico awendia ta cu hopi mayor ta traha anochi, tin dos trabou y tin famianan cu ta consisti di solamente un mayor.

Pa preveni cu e hobennan aki ta cay den gara di “gangnan” y/of busca atencion cerca hende cu mal intencion mester percura pa hobennan por acudi te den oranan di anochi cerca instancianan cu por brinda guia a traves di profesionalnan, sr. Tjon ta duna di conoce.

 

A traves di un maneho transparente lo percura pa recluta di inmediato e personal necesario pa e stakeholdernan concerni, p’asina por cuminsa atende berdaderamente cu e desafionan social cu consecuentemente ta conduci na un aumento di criminalidad, sr. Tjon ta conclui.

Leave a Reply

Top