Roland Croes, Director di SETAR ta admiti: Si no tabata pa publicacion di Panama Papers, hamas SETAR lo a haya sa kico su empleado di confianza tabata haciendo

Confirmando cu no tin ningun clase di control interno

 
“Loke nos kier a stress un bes mas como SETAR ta cu di momento cu e asunto aki a bira conoci nos a tuma tur e pasonan cu un compania mester tuma pa haya sa mas liher posibel kico ta pasando.

Nos preguntanan tabata ‘con esaki tabata posibel y pakico un empleado di nos ta riba e lista ey di Panama Papers.’

Aki ta trata si di un persona cu ta cumpra ekiponan pafo di e compania y nos no tin un bista riba dje cu ken e ta anda despues di trabou of banda di trabou.

Ta pesey cu ta bon pa splica cu den SETAR bo no ta wak e persona aki. Tur producto cu nos ta cumpra ta wordo paga.

Pero ki sorto di deal of otro actividad ta tuma lugar cu otronan, nos no tabatin un bista riba dje. For di momento cu nos a mira su nomber riba e lista di Panama Papers, nos a tuma e pasonan necesario.”

 

BENTON CURTIS, ABOGADO DI BROAD AND CASSEL
Abogado di SETAR na Miami sr. Benton Curtis no por a bisa mucho, pasobra e ta envolvi den un law suit cu a wordo deposita den Corte Federal na Miami, Florida.

Si e kier a splica cu apesar cu bo tin como compania tur bo regla y policy na ordo – y SETAR tabatin nan na ordo – bo ta haya hendenan den posicion halto manera sr. Egberto Yvan Koolman kende ta crea un fachada cu tabata indica cu e tabata sigui e reglanan.

 

“Den nos pensamento cu hasta e mihor y mas experencia controlador lo no a ripara esaki. E intencion di esnan cu ta comete fraude ta p’esaki nunca wordo detecta.

Ta pesey cu semper bo mester haci bo huiswerk bon y tin bastante prueba, sigur ora ta trata di un compania estatal, prome bay over na haci acusacionnan.

SETAR a tuma e pasonan corecto pa busca e servicio di un tercer partido independiente pa haci e investigacion interno.

Esey ta loke a sosode den e compania y podise tin hende a pensa cu por tabata FBI, pero esey no t’e caso.

 

PATRICK BROWN, ABOGADO LOCAL DI SETAR
“Mi kier a splica en corto cu tin varios aspecto legal conecta cu e caso aki. Tin e aspecto di ley laboral cu mester a tene cuenta cu ne.

Banda di esaki tin e aspectonan interno di SETAR y e aspecto civil. Esey ta ensera si ta purba di cobra e daño cu a wordo haci bek for di e persona aki y e hendenan cu a traha hunto cune.

 

P’e parti ey tin e aspecto di Aruba y esun di exterior. A dicidi cu e parti civil ta wordo haci na Florida, pasobra eynan mayoria di esnan cu e comete e fraude ta concentra.

E ultimo aspecto t’esun criminal.

Nos a papia cu Departamento di Polis y Fiscal na Aruba caba for di un comienso. Polis y Fiscal a bisa cu lo ta mihor pa investiga e asunto internamento prome ya cu e tempo ey no tabata bon conoci con e asunto aki a tuma lugar.

Awor tin un mihor bista cu a desemboca de un caso na Miami,” segun abogado di SETAR, Patrick Brown.

 

MENTIRA

Ora cu analisa e diferente declaracionnan duna den e conferencia di prensa di diahuebs ultimo por constata un cantidad di intriga.

Un cantidad di mentira e.o. di parti di Ministerio Publico cu ta laga sa cu no sa mes di e caso aki. Cu no tin ningun denuncia, anto con Ministerio Publico por conseha pa laga e investigacion interno tuma lugar prome cu nan tuma over.

 

E tipo di mentiranan aki ta pone hende perde confianza den nos sistema hudicial, manera Ministerio Publico cu ta haci manera nan no sa nada. Por ta berdad cu no tabatin denuncia, pero debidamente nan ta na altura di kico ta pasando den SETAR.

Te ainda ta keda e pregunta, pakico Ministerio Publico mes no a insitui un investigacion ambtshalve, a sabiendas cu ta trata di un compania estatal.

Ministerio Publico tambe ta atende su casonan cu man di felpa?

 

 

 

Top