Rosa College cla pa ricibi studiantenan cu localnan moderno y speelplaats bunita asfalta

“Tur cos ta cla pa ricibi e studiantenan?” Prome Minister Mike Eman a puntra ora cu el a yega di bishita na Rosa College, un scol di mas di 150 aña cu a haya su prome renobacion completo bou Gabinete Mike Eman II.

E biaha aki e bishita di Prome Minister Mike Eman y su colega Benny Sevinger tabata pa mira e ultimo trabounan cu ta wordo haci prome cu ricibi e studiantenan, cu ta asfaltamento di e speelplaats cu un acabado fini pa proteccion di e muchanan.

 

“Mi ta contento cu un scol asina historico manera St. Rosa College cu den historia di educacion na Aruba a hunga un rol sumamente importante pa scol basico ta duna realce na renobacion di centro di ciudad.”

Ta masha importante den e renobacion aki, Eman a bisa, cu e speelplaats ta bay haya un acabado bunita y fini. Aworaki mayoria speelplaats di scolnan na Aruba tin asfalt, pero uno hopi bruto cu ta causa lesion n’e muchanan ora di wega, “pero esaki lo tin un bunita acabado.”

 

El a sigui splica cu Gobierno a pone un presupuesto pa mehora un serie di speelplaats di scolnan cu un acabado mas fini pa proteccion di e muchanan. E trabounan ta programa pa tuma lugar den e temporada di vakantie aki.

E mandatario a gradici tur esnan cu a coopera p’e proyecto aki, cuminsando cu Minister di Enseñansa Michelle Hooyboer-Winklaar, Minister Benny Sevinger, DOW, SKOA y esnan di Rosa College mes.

 

“Nan a bisami caba cu e docentenan no por warda pa muda y inicia nan trabou den un ambiente asina agradabel e mandatario a splica.”

Durante e bishita aki tabata presente tambe sr. Eric Vrolijk, di seccion Uitvoer di DOW, kende a splica cu un parti di trabou cu a tuma nan hopi tempo tabata e parti di dak, cu tabata di e material asbest. P’esaki mester a tuma tur e precaucionnan necesario, cu a tuma su tempo. Na su lugar a pone dak di aluminium cu isolatie cu ta brinda mas frescura den e localnan.

 

E scol, parti di basis y kleuter a wordo completamente renoba, hasta tegels y bañonan. Adicional a construi algun baño extra, di cual un di nan ta espacioso cu un rolstoel por drenta den dje, un cantina, y espacio pa docentenan reuni.

 

Leave a Reply

Top