Rosabelle Illes artista invita na Carnaval Internacional de las Artes Barranquilla

Entre 9 y 12 di februari ultimo, a tuma lugar e di 11 edicion anual di Carnaval Internacional de las Artes na Barranquilla, Colombia. Tur aña, Fundacion La Cueva ta invita un total di 60 artista, actor, escritor, musico y academico pa comparti nan obra cu e publico den un programa extenso y varia.

Despues cu algun di e organisadornan a presencia e escritora Arubiano Rosabelle Illes su presentacion n’e Feria Internacional de los libros na Bogota aña pasa, nan a keda impresiona y a invita Illes pa presenta su poemanan n’e Carnaval Internacional de las Artes na Barranquilla.

 

“Asina cu mi a ricibi e invitacion mi a bay lesa mas tocante e historia di e evento y mi a sinti mi honra ora cu mi a haya sa cu mi lo presenta den e espacio historico La Cueva”, Illes ta conta.

Estableci na aña 1954, e bar La Cueva tabata bishita pa varios artista, escritor y academico di Colombia manera Gabriel García Márquez, Alejandro Obregon y otronan cu hunto a forma e famoso Grupo de Barranquilla.

Algun aña despues, e bar a wordo desaroya den un restaurant y galeria y ta sigui fungi como un espacio unda obra y proyectonan literario, academico y artistico ta wordo crea, discuti y ehecuta.

 

“Tabata un experencia divino di por a presenta mi poemanan n’e sitio aki dilanti un publico cu, apesar cu mi poemanan ta na Ingles y Papiamento, ta sinti mi palabranan y biba cu mi.

E discusionnan cu mi a hiba cu algun persona den e publico a inspira mi enormemente.

Tabata special tambe pa wordo acompaña p’e musica di Ivan Barrera, un artista naci na Barranquilla, pero residencia na Aruba.”

 

Banda di su propio presentacion, Rosabelle Illes a sigui e programa extenso di 4 dia.

“Fuera di por a presenta den un espacio cu ta nifica asina hopi pa literatura, mi tabata contento di por a atende e sesionnan di escritornan renombra manera Octavio Escobar y Juan Manuel Roca. Escobar, na un manera hopi claro a bisa “si viene facil hay que desconfiarlo,” ora el a toca e importancia di redefini bo mes constantemente.

Esaki a resona cu mi como cu mi semper ta busca pa ta inconfortabel ora cu mi ta creando un obra.

Si mi ta sinti confortabel, mi sa cu mi ta riba un caminda peligroso artisticamente.

Locual a impresiona mi di Juan Manuel Roca, aparte di su poemanan, ta cu durante su presentacion, e publico tabata grita cierto titulo pidiendo pa nan wordo recita.

M’a sinti mi na un concierto di un rockstar cu su fanaticonan gritando p’e toca su hits,” Illes a conclui hariendo.

 

E escritora ta regresa Aruba cu mas conocemento y experencia pa sigui traha riba su proyectonan.

Pa mas informacion tocante Rosabelle Illes y su trabou por bishita www.rosabelleilles.com

Top