Rotary Charity Golf Tournament 2016 a kibra tur record un biaha mas!

Diasabra ultimo dia 3 di december a tuma lugar pa di 17 aña consecutivo e exitoso Charity Golf Tournament organisa pa Rotary Club of Aruba.

E aña aki un biaha mas e team dinamico di Rotary Club of Aruba a kibra tur record na unda a recauda e gran suma di Afl. 130.000,-.

Rotary ta sumamente contento cu e logro aki p’asina por sigui contribui na comunidad di Aruba.

Un total di 30 team a participa diasabra n’e prestigioso golf course di Tierra del Sol.

E exito aki no tabata posibel sin e sosten continuo di nos “Planitum Sponsors”, Caribbean Mercantile Bank y Aruba Airport Authority.

Sin laga afor, e tremendo team di Tierra del Sol, cu cada aña ta haci su maximo esfuerzo pa surpasa tur expectativa pa cu servicio y bon ambiente di torneo.

Despues di e torneo a sigui e anochi cu un tremendo dinner y premiacion. E team ganador a resulta e team di Compra Ltd. cu tabata consisti di Steve Bowen, Giovanni Albers, Hans Holwerda y Jan Roelofs Valk.

E team ganador a ricibi nan premio cortesia di Digicel. Na di dos lugar a keda e team “Pasa Pret” cu ta consisti di Gregory Croeze, Shensly Tromp, Orlando Rasmijn y Peter Looye, a ricibi un premio cortesia di Boolchands.

E team di DHL cu tabata consisti di Sidney Flanegin, Cadochi Kock, Randolph Arends y Glenn van Wijk a keda na di tres lugar cu un premio cortesia di AMC Unicon.

Tambe tabatin premio p’e “closest to pin” na diferente holes, Nigel Nedd (#3), Cisco Quant (#7), Otto van Dieren (#15) Y Jim Hayes (#17).

A sigui cu premiacion di “longest drive” hende homber Edson Kelly y hende muher Anjelica Rooi. E special “Hole-in-One” a bai pa Steve Lacle, na “hole” 13.

Ademas di esaki tabatin rifa cu premionan masha atractivo, e.o. weekend stays, joyas, dinners, gift certificates y un television 49”. Tambe a tene un mini-auction, cu diferente pakete atractivo.

Pa medio di esaki, e mesun participantenan a haya un oportunidad pa haci nan contribucion adicional.

Durante e premiacion Rotary Club of Aruba a haci entrega tambe di cheque n’e diferente fundacionnan. Sonrisa, YMCA y Fundacion Ban uni un Man pa nos Muchanan a ricibi un cheque di Afl.20.000,- cada un.

Fundacion Hende Muher den Dificultad y Stichting Sociaal Fonds Colegio Arubano a ricibi un check di Afl. 5.000,- cada un.

Tur representante di e fundacionan aki a keda masha contento y agradecido cu e bunita gesto aki. E resto di e fondo cu a wordo recauda lo wordo reparti den e dianan benidero.

Presidente Stanley Looman a keda super contento cu e fondo recauda e aña aki. Esaki ta danki na e gran trabao di e comite organisador.

“Mi ta hopi orguyo di e team aki cu a precura pa un biaha mas surpasa e suma di aña pasa. Tambe mi ta agradecido n’e companianan cu a yuda nos e aña aki atrobe”, Stanley Looman ta sigui comenta. “

Asina aki Rotary Club of Aruba ta sigui cu e bunita trabao di yuda esnan di mas nececidad den nos comunidad”.

Rotary Club of Aruba kier a gradici un y tur cu e aña aki un biaha mas a deposita nan confiansa den e torneo aki.

Na tur miembro di e comite organisador di Rotary Golf y tur otro miembro di Rotary y Rotaract Club of Aruba cu di un of otro manera a duna nan sosten, contribuyendo na un evento exitoso. Nos ta spera di conta cu boso sosten atrobe na 2017.

Top