Rotary Club of Aruba a organisa un anochi di donacion y aprecio

Recientemente Rotary Club of Aruba a organisa un anochi masha ameno na unda a haci donacion na diferente instancia den nos comunidad. Ademas di esaki a duna un aprecio n’esnan cu a yuda y contribui pa hopi aña na Rotary Club of Aruba.

E anochi aki tabata e culminacion di e exitoso Fiesta Rotaria 2017 cu a tuma lugar den april ultimo.

 

Rotary Club of Aruba ta organisa tur aña e Fiesta Rotaria cu e meta pa recauda fondo p’asina por continua cu nan servicio comunitario, desaroya proyecto cu tin un impacto positivo den nos comunidad y asisti instancianan cu ta den necesidad

Presidente Stanley Looman y otro miembronan di directiva di Rotary Club of Aruba a haci entrega di diferente check.

E instancianan cu e aña aki a ricibi un donacion for di Rotary Club of Aruba ta Aruba Demolay Chapter No1; Aruba Methodist Church (Meals on Wheels); Arubaanse Padvinders-Gilde; Breakfast for Kids; Clown Doctors Aruba; Fundacion Autismo Aruba; Centro Kibrahacha; FEPO; Fundacion Respetami; Grupo Scout Sonrisa; Hende Muher den Dificultad; Stichting Micky’s Foundation; Scouting Aruba; Stichting Bevolkingsonderzoek Borstkanker (BOB); Stichting Edmund Harms; Stichting Funari; Social Funds Colegio Arubano; SVGA y YMCA.

 

E anochi a sigui cu entregamento di certificado di aprecio n’esnan cu pa añas ta contribui na Fiesta Rotaria den forma monetario of ta participa como boluntario den e weekend di Fiesta Rotaria.

Rotary Club of Aruba kier a gradici tur su miembronan, Rotaractors, Interactors, boluntarionan y sponsors pa haci Fiesta Rotaria y e rifa un exito un biaha mas.

Rotary Club of Aruba ta spera di por conta cu boso sosten atrobe otro aña pa por sigui sirbi comunidad.

 

Top