S.V. Britannia campeon den futbol femenino 2016-2017

E campeonato femenino 2016-2017 di Arubaanse Voetbal Bond a yega su final. E team di S.V. Britannia a bay cu e victoria di 1-0 contra di RCA durante e di 2 wega cu tabata uno decisivo. S.V. RCA Dames mester a gana p’asina pusha un wega mas, pero S.V. Britannia a demostra pakico nan ta un di esnan mihor den futbol femenino.

For di comienso di wega ambos team a mustra di kier a gana y na diferente ocasion nan a yega area di gol.

 

Na 17 minuut di wega Amy Henao di S.V. Britannia a haya e oportunidad y a anota gol pa habri e marcado. E wega a continua fuerte unda cu Milvienne Henriquez di S.V. RCA a crea un peliger pa S.V. Britannia.

Na 19 minuut di wega Milvienne Henriquez a haya un bon oportunidad pa anota gol y empata e wega, pero e no a logra esaki.

S.V. Britannia a sigui ataca unda cu e delanteronan Amy y Aliah a purba di crea peliger pa RCA, pero no a logra anota. RCA no a keda leu y tabata crea peliger pa S.V. Britannia unda cu tabata haci uzo di oportunidad ora cu tabata pasa e bala pa Milvienne Henriquez.

 

Den e di dos tempo di wega, ambos team tabata bayendo pareu y tabata ataca y buscando gol. S.V. RCA a subi tereno agresivo buscando pa anota gol pa bay cu e victoria. Na 61 minuut di wega Milvienne Henriquez a bolbe haya oportunidad pa empata e wega, pero keeper di S.V. Britannia a sali y percura pe bala no bay gol.

Na 63 minuut bala a dal den tubo, despues di un tiro liber di S.V. RCA. Na 65 minuut S.V. RCA a bolbe ricibi un tiro liber y un biaha mas no a probecha y e gol no cay.

Na 82 minuut di wega Amy Henao a ricibi un carchi geel. S.V. RCA a ricibi varios oportunidad pa anota gol, pero no a sa di probecha nan.

 

Presidente di AVB, Ing. Richard Dijkhoff, a haya cu e wega a bay masha sportief y ambos team tabatin nan fanaticada.

AVB a felicita S.V. Britannia pa bira campeon un biaha mas y S.V. RCA cu a keda como sub campeon. Pa algun aña caba e dos teamnan aki a topa otro den final y nan t’e rivalnan grandi den division di damas, Richard Dijkhoff a expresa.

E final tabata loke cu mester tabata y e wega a resulta masha emocionante.

Coach di S.V. RCA, Ricky Henriquez a indica cu nan a cambia e lineup y nan no a train mucho cu e estilo aki, pero e ta haya cu nan a bay bon.

“Nos a haya oportunidadnan, pero dor di un descuido gol a cay”, Ricky Henriquez a expresa.

 

Coach di S.V. Britannia, Jean Pierre Fingal tabata contento cu e team di S.V. Britannia a bay cu e titulo di campeon.

“S.V. RCA a crea hopi chens pero mi keeper a bin hopi sublime”, el a expresa. No tabata facil pa mantene e concentracion pa 90 minuut, pero nan a sa di demostra cu por. E keeper di S.V. Britannia t’esun cu a salba nan, pero tambe con nan a hunga a hiba e team na victoria.

 

E aña aki S.V. Britannia ta campeon, S.V. RCA sub campeon, S.V Estudiantes 3e lugar y La Fama 4e lugar. E team mas disciplina den e campeonato tabata Dakota, mihor keeper Lyxienne Loopstok di S.V.

Dakota, mihor defensa, Yalda Doolabi di S.V. RCA, mihor medio campo Crilia Croes di S.V. Estudiantes, mihor delantero Susan Aalikay di S.V. Britannia, goalgetter di campeonato Milvienne Henriquez di S.V. RCA.

Nobato di aña Ashley Dooglas di S.V. Estudiantes, hungador mas popular Carolina Werleman di S.V. RCA, hungador mas disciplina Jourrane Maduro di S.V. Britannia, mihor coach S.V. Britannia y M.V.P di campeonato Jennifer Henao di S.V. Britannia.

Top