Sala yen pa scucha Maneho di Lionfish di Aruba

Diaranson anochi a tuma lugar e prome di e serie di lectura tocante di bida marino di Aruba, organisa pa Aruba Reef Care Foundation. Un sala yen a scucha Giancarlo Nunes, biologo marino, graduado di Universidad di Groningen, elabora riba lo ultimo di e maneho di Lionfish na Aruba y e iniciativa di Lionfish Aruba yama ALFI.

 

Aruba Reef Care Foundation a ranca sali cu e serie di lectura pa 2017 cu tres charla programa, pero ta premira cu mucho mas lo sigui.

E prome orador invita tabata Gian Nunes kende a papia di Lionfish. Lo sigui dia 12 di april proximo Sietske van der Wal, docente di Biologia y boluntario di Fundacion Turtuga Aruba kende lo papia di turtuganan marino di Aruba.

 

Dia 26 di april lo toca turno na Miranda van Breugel, studiante di Universidad di Groningen cu lo amplia riba e especienan di Tribon y Raya (Chucho) di Aruba.

Na final di april lo anuncia e sigiuente oradornan y lo sigui explora bida marino di Aruba.

 

 

ARUBA LIONFISH INITIATIVE = ALFI

Sr. Nunes a splica e historia di e Lionfish invasivo, su menasa pa nos ecosystema y e posibel manera pa combatie.

El a splica con e iniciativa nobo ALFI, cortico pa Aruba LionFish Initiative, ta trata di structuralmente combati lionfish pa medio di un plan di accion.

E golnan ta e.o. pa activamente y motiva boluntarionan pa gara lionfish, comparti informacion, crea facilidad di compra y benta dor di crea un centro di distribucion y tambe investigacion.

 

CHARLA EXITOSO CU SALA YEN

E prome lectura di e serie tabata un exito cu un sala completamente yen cu un publico diverso y sumamente participativo.

Na final tabata tin oportunidad di haci pregunta y cualnan a ser contesta dor di e experto presente.

Por ultimo a saca e ganador di un doorprize poni disponibel dor di Nos Clubhuis Hadicurari, y cual a bay p’e feliz ganador Erik Nijhuis.

 

E interes y reaccion positivo di publico ta indica cu tin hopi interes creciente pa bida marino di Aruba y Aruba Reef Care lo sigui conscientisa tocante di esaki henter e aña’ki.

Top