San Nicolas lo ta un biaha mas e centro di un explosion di Arte

 

Despues di un exitoso Aruba Art Fair na 2016, cu a conta cu mas di 10.000 bishitante y participacion di mas di 150 artista local y internacional, Pure Aruba Events Foundation ta preparando pa presenta e di dos edicion di e Festival di Arte mas grandi cu Aruba a conoce.

Ya caba mas di 100 artista y artesano local y internacional a inscribi pa participa n’e siguiente art fair cu lo tuma luga 24 pa 26 di november 2017 den e cayanan di San Nicolas.

Tambe e aña aki 12 artista internacional conhuntamente cu 4 artista local lo laga nan estampa atrás pa medio di e asina yama “murals,” posicionando Aruba na nivel internacional un biaha mas pa loke ta trata e disciplina di Street Art.

 

E focus e aña aki lo wordo acentua tambe riba e turista en busca di un exposicion di cultura y arte, musica y bailenan, canto y tur lo demas cu ta trece lo artistico di e habitante di Aruba, combina cu artistanan na nivel internacional.

Paketenan special ya caba a wordo reserva dor di diferente hotel na Aruba p’e turistanan cu lo ta bishitando e isla.

Lo tin tournan special pa trece e bishitante mas cerca di e cultura di Aruba y na mesun momento, observa e tremendo manifestacion artístico di e mihor artistanan cu lo ta na Aruba pa pinta e murals, den nan mayoria artistanan 3D.

 

San Nicolas sigur un biaha mas lo haya un toke di transformacion. Diez diferente edificio lo wordo transforma cu piesanan colorido y yamativo crea pa artistanan local y internacional di entre otro Spaña, Italia, Portugal, Kazhakstan, Alemania, Belgica y Hulanda.

Na caminda p’e weekend di e feria, Aruba Art Fair ta organisa algun proyectonan artistico pa comunidad.

E aña aki un bes mas lo tin e proyecto Art Expression, unda cu hunto cu partnernan strategico, ta envolve hobennan pa siña conoce nan mes atrabes di pintura y creacion y ta percura pa scolnan participante ricibi un canvas di 2×3 meter p’asina desplega e temática: “Kico San Nicolas ta pa Bo?”

 

E proyecto ta conta cu participacion di mas di 25 scol, YMCA, Da Vinci Academy y varios otro instancia, e.o. Cedes, cu ta un scol pa muchanan cu Autismo y Down Syndrome. E canvasnan lo wordo exponi durante e Feria di Arte.

Debi na su exito comunitario, e division aki di Aruba Art Fair a crece mas e aña aki. Tur canvas lo wordo entrega na e scolnan y lo wordo exponi durante e feria riba dianan 24, 25 y 26 di november.

Tambe lo tin un competencia di fotografia titula Nature & Faces. Tur fotografo ta keda invita pa participa cu nan mihor potret di e caranan di Aruba of e naturalesa di Aruba.

E 5 finalistanan di cada categoria lo wordo selecta p’e editors-in-chief di Aruba Nights Magazine, Express Magazine, Focus Aruba, Island Temptations Magazine, Xclusivo Magazine, un representante di Aruba Tourism Authority y un representante di City Hall Doral Florida.

 

E seleccion di potret aki lo wordo exponi durante e Feria di Arte y e dos ganadornan, un di cada categoria, lo wordo selecta p’e bishitantenan di e feria atraves di un sistema di voto digital.  E dos potretnan ganador lo wordo transporta pa Florida y lo wordo exponi y poni na benta den e prestigioso edificio di City Hall Doral, Florida pa un temporada di un aña.

Naturalmente, e Feria di Arte no lo ta completo sin e “street performances” den e cayanan di San Nicolas.

Manera aña pasa, tur bailarin, musico, cantante, poeta, actor y tur artista cu di un of otro manera ta desea di duna un presentacion durante e tres dianan di e feria, ta invita pa registra atrabes di e website www.arubaartfair.com p’asina hunto nos engrandece e evento cultural aki.

 

Calling all artists:

Aruba Art Fair ta extende e invitacion na tur artesano y artistanan local, cu no a logra registra ainda, pa haci esaki mas pronto cu ta posibel. Performing artists tambe ta wordo yama pa participa y inscribi.

Especialmente p’e competencia di Fotografia y esnan cu ta participa den e Fasiion meets Arts, na unda tur ta uni pa haci un mundo di fantasia y moda.

Pa mas informacion con pa inscribi, participa of simplemente ta parti di Aruba Art Fair, bishita nos website www.arubaartfair.com

Top