San Nicolas Taekwondo Center a sali Best Team den Campeonato Nacional di Dia di Betico

Diasabra ultimo a tuma lugar na Compleho Deportivo Frans Figaroa e prome Campeonato Nacional di Taekwondo di aña 2017.

Aruba Taekwondo Bond “ARTBO” a organisa e campeonato di Dia di Betico aki y 6 scol di Taekwondo a participa y a haci e campeonato aki uno espectacular pa tur e atletanan cu a subi e veld di combate.

 

Master Eric Barry y Shaul Illidge a scoge nan 7 mihor atletanan pa bringa p’e copa di Best Team y e atleta hobennan aki a logra di saca cara di nan scol y di nan dos instructornan, como tambe di e districto di San Nicolas.

Un team di nobato cu a subi veld y Master Eric Barry ta hopi contento cu su team y tambe cu Shaul Illidge, kende ta bin for di Oranjestad pa train te na San Nicolas y awe por mira un San Nicolas bek riba e pista saliendo Best Team despues di basta tempo.

 

Jewel Illidge, kende ta un di e faboritonan a scama den su combate, mustrando tecnicanan di nivel. Sin duda Jewel Illidge semper ta hala atencion di tur e refereenan, kendenan no sa duda pa scoge Jewel Illidge como nan Best Female Fighter infantil.

 

ARTBO ta felicita tur e scolnan di Taekwondo cu a participa n’e Campeonato Nacional di Dia di Betico y specialmente na Master Eric Barry y Shaul Illidge cu nan logro.

Top