Sarah-Quita Offringa victorioso na Sur Korea

Sarah-Quita ta embarca riba un viahe largo di no menos cu 24 ora di vuelo pa yega Sur Korea via Amsterdam, Istanbul, Seoul, Busan, Ulsan y finalmente ta yega Jinha Beach den parti sur di Sur Korea. Na Sur Korea ta unda e prome competencia pa e temporada di windsurf ta inicia y ta dura di 2 – 8 di mei. Ya durante 5 dia biento ta hopi debil cu ta causa cu e competencia ta para.

 

Diasabra anochi, sinembargo Sarah-Quita ta ser spierta pa su ruman desde Aruba cu ta inform’el e cu biento ta bay supla rib’e penultimo dia cu ta diadomingo.

Mirando cu tin un diferencia di 13 ora cu Aruba via windguru ta check si tin biento pa diadomingo, mientras cu Sarah-Quita ta drumi. Grandi tabata Sarah-Quita su sorpresa cu e noticia cu biento a lanta y e competencia posiblemente por tuma lugar.

Sarah-Quita ta delibera via facetime cu Quincy relaciona cu e ekipo mas favorabel pa uza durante su manga.

 

E area di Jinha Beach tin su retonan di biento, ola, wier y desperdicio cu ta drief den e awa.

Sarah-Quita ta pasa di e eliminacion clasificatorio pa e prome eliminacion final.

Mirando cu den curso di e anjanan e regatistanan femenino a mehora enormemente, Sarah-Quita ta consciente cu tur cos ta depende di un salida kerpi.

Exactamente su timing na perfeccion ta haci cu e ta crusa e liña como prome y su contrincante Lena Erdil ta pega manera un cleconchi riba dj’e.
Sinembargo, Sarah-Quita ta yega prome na e boei y ta logra lora y sali y gara biento limpi.

E ta acelera, crea suficiente distancia pa sigui maniobra rond otro boeinan y canta victoria.

Asina e penultimo dia di competencia di windsurf ta trece victoria pa Aruba na Sur Korea.

Su paisano Ethan Westera cu ta campeon hubenil di slalom tambe a haci un bon papel. Visiblemente, Ethan tin hopi velocidad y ta bira dolor di cabes pa hopi di e grandinan.

 

E siguiente competencia ta tuma lugar na Yokosuka Japon dia 11-16 di mei venidero.

Ban apoya nos regatistanan arubiano den nan afan pa demonstra cu “Aruba tin aden”.

Leave a Reply

Top