Sea honesto y ta un ehempel pa otro ta esencial pa bira Polis

Inspector di Polis, Carlos Hodge a baha cu pensioen for di Cuerpo Policial y su departamento di recherche a tuma despedida di dje. El a indica pa bira un Polis no ta facil pasobra mester haci hopi test pero por perde e trabou facil si no keda na e reglanan.

Inspector Carlos Hodge prome cu el a drenta Cuerpo Policial Aruba, el a haci su examen na 1978 y pa 1979 el a drenta Cuerpo Policial di cual e tin un trayecto largo. Na momento cu el a bisti su uniform como agente policial, su carera a cuminsa y e tabata sa cu e tin un obligacion.

 

Prome cu Carlos Hodge a bira Polis, e tabata un mecanico di cual el a gusta traha riba auto y riba motor y verf auto cual ta algo cu ainda e ta haci. Den e trabou di Polis, nan mester tin algo pa relaha cu ta algo diferente p’e trabou pisa cu nan tin. Loke tabata importante pa Carlos Hodge den su careda como agente policial ta cu el a siña hopi cos.

“E trabou aki a pone bo madura, pone bo mira cosnan di otro angulo, kiermen bo careda ta largo pero ta bo ta esun cu mester bisa cu kier haci cambionan”, Carlos Hodge a indica.

Por siña hende hopi cos pero si e persona no ta kere den e cambionan, e ta tanto bal pasobra cambionan ta importante.

 

Na momento cu Carlos Hodge a inicia, el a cuminsa den e parti di raspa ploeg. Esaki tabata cu nan no ta duna chens pero si un hende haci un violacion den trafico e raspa ploeg ta yega duna boet. Esaki a siña nan cu si nan conoce un hende, nan mester por bisa e persona cu el a haci fout y esey ta algo cu den comunidad tin hopi falta di dje.

“Amigo cu amiganan tin miedo di bisa otro cu ‘bo ta fout, bo no tin rason’. Pasobra nan ta sinti cu bo a bira mi enemigo”, el a bisa rib’e punto aki.

Purba di acepta ora cu un persona bisa cu bo a haci fout, pasobra e ta amigo of amiga. Hende cu no por acepta esey no ta cla pe mundo aki ainda, tuma e responsabilidad.

“Un cos cu ta importante ta kere den bo mes y semper keda honesto. Esey ta hopi importante pa un persona keda honesto. Ora un persona haci algo como Polis mester haci algo cu amor y como parti di trabou, pero no cu e expresion cu lo haya algo bek pasobra na momento cu e Polis sinti cu e ta haci esaki pa haya bek e ta den e trabou robes”, el a bisa.

 

Carlos Hodge a baha cu pensioen, pero e ta kere cu un persona cu bira Polis mester por siña otro con pa haci e trabou bon. Pa esunnan nobo por siña pa haci nan trabou bon y ta un bon Polis, nan mester a haya un bon ehempel di esunnan cu ta sali. Semper e tabata un bon rol model pa motibo cu e no ta un persona perfecto, pero Inspector Hodge tabata haci su maximo esfuerso pa ta miho y esey a yuda su careda como agente policial.

 

Na momento cu el a termina cu su estudio di Polis, Carlos Hodge a bay traha cu Ricardo Muller kende tabata hoofd mentor. Despues di su trabou cu Ricardo Muller, Carlos Hodge a bay traha na oficina di Recherche na Oranjestad pa 1 aña y di eynan el a bay bek San Nicolas y bira mentor. Na 1985 el a bay den e departamento di narcotica bou Josepha, miho conoci como “Koyac” y despues di esaki el a bay traha como siguridad na banco.

Na aña 1998 Carlos Hodge a regresa KPA y bira wacht comandant y a ripara cu hopi cos a cambia. Carlos Hodge a trece mas disciplina bek pasobra esaki tabata necesario y na 2001 el a bira hefe di recherche te na su ultimo fecha.

Tambe Carlos Hodge a traha cu VIP team, cual tabata ora hendenan importante manera Reina Beatrix tabata bin Aruba, nan tabata su proteccion.

 

Pa 16 aña largo como hefe di Recherche el a haci hopi cambio den e departamento.

“Mi por bay libremente pasobra mi sa cu esnan cu mi a laga atras encarga, ta capaz, honesto y corecto. Loke cu nan mira nan ta haci y mi ta kere cu sigur esnan cu a keda atras ta hende confiabel, por conta cu nan y nan ta honesto”, Inspector Hodge a papia riba su coleganan di departamento di Recherche.

El a conseha tur esunnan cu ta bay bira Polis pa nan haci nan best, pa no pone nan buki un banda despues di a slaag pasobra leynan ta bibo y ta cambia tur dia. Nan mester keda na altura di e leynan constantemente, pasobra eseynan ta e toolnan cu polis ta traha cu ne.

 

Ora Polis traha, su bukinan, su conocemento y experiencia ta nan guia cu nan por logra te dia cu nan baha cu pension y lagando un bon cos atras. Hobennan cu ta bay bira Polis, nan mester cuminsa midi nan amistadnan pasobra nan mester sa cu nan ta un ehempel y cierto cosnan cu nan tabata haci no por haci mas pa motibo cu bista ta riba nan. Cierto amigonan cu no ta bon ehempel pe persona su funcionamento, mester traha un distancia cu nan. Esaki ta pa motibo cu esunnan cu mira e agente cu e hendenan aki, ta cuminsa perde un tiki confiansa den e agente.

Leave a Reply

Top