Segun Chris Romero di MEP – E Gobierno nobo lo no honra ningun nombracion of beneficio otorga despues di 22 di september

Den e ultimo dianan nos ta tendiendo di hopi movecion straño cu e Gobierno demisionario actual ta hasiendo.

Segun nos por a compronde, tin un cantidad grandi di ex cordinador, campañador y sostenedor di e partido berde cu a wordo hinca den diferente departamento gubernamental. Esaki sigur ta un falta di respet pa nan mes hendenan, pasobra nan sa mihor cu e nombracionnan aki ta ilegal y no valido.

 

Partido AVP tabatin 8 aña pa regla e puesto laboral di nan campañadornan, y teniendo esaki na cuenta mi ta puntra mi mes, pakiko bo no a hasi’e anto?

Awor cu e resultado di eleccion 2017 a keda conoci, y cu pueblo a pidi pa un cambio, awor kier core hasi un cantidad di nombracion sabiendo cu na momento cu e Gabinete nobo wordo instala, dicho nombracionnan no lo tin valides mas.

 

Algo cu tambe a yega na mi atencion ta cu Mike de Meza, e Minister demisionario encarga te ainda cu e carteranan di Turismo, Transporte, Energia y Medio Ambiente, a dicidi di kibra e moratorio cu tabatin pa cu transporte publico, unicamente 5 dia despues di eleccion.

For di dia 27 di september sr. de Meza a encarga di acomoda, entre otro, algun cordinador y campañador, cu un vergunning di taxi.

 

E moratorio pa cu transporte publico a wordo implementa cu e finalidad di mantene un control riba e cantidad di taxista, como cu ya caba e cantidad di taxi cu tin ta di mas y nan no ta hayando suficiente entrada.

E ta un iresposabilidad loke cu sr. Mike de Meza ta hasiendo pa acomoda su campañadornan, y e ta un lastima cu e personanan aki lo bay sufri un gran decepcion ora cu e Gobierno nobo bay over na honra e moratorio bieu, te ora cu bin cu argumentonan valido ariba mesa pa cambia esaki.

 

Mi kier hasi enfasis cu nos no tin nada contra e personanan cu sea a wordo nombra despues di eleccion, a haya vergunning di taxi, of a haya cualkier otro tipo di beneficio politico.

E personanan aki ta den nan pleno derecho di campaña y vota pa cualkier partido di nan escohencia, pero e ta un lastima pa mira con e personanan aki a wordo tuma hasi dor di esnan cu nan a deposita confiansa aden.

 

Tur Minister di e Gabinete nobo lo bay evalua cada nombracion y cada beneficio otorga despues di 22 di september, pa wak bon si e trahadornan y e beneficionan aki ta necesario.

Den otro palabra, cada nombracion y beneficio otorga innecesariamente no lo wordo honra.

 

Leave a Reply

Top