Segun Daphne Lejuez di MEP – “Economia no ta solamente pa traha placa, pero tambe pa crea oportunidadnan nobo”

Durante e conferencia di prensa semanal di partido MEP, Parlamentario Daphne Lejuez, a papia di e plan di gobierno di partido MEP pa amplia y diversifica den tecnologianan nobo, y crea espacio p’asina hisa e calidad di bida.

 

Segun Lejuez, pa por hasi un ampliacion y diversificacion di economia dor di tecnologianan nobo, esaki lo bay rekeri revision y introduccion di leynan, cual lo mester conta cu aprobacion di Parlamento.

“Pa bo introduci tecnologianan nobo, no ta solamente di parti comercio e mester bin, of di parti di Gobierno. Pero e lo rekeri un analisis profundo tambe di kiko ta e parti personal den e transaccionnan. Nos ta papiando di e-commerce, payment gateways, diferente cosnan cu ta rekeri e parti personal.”

 

E recien huramenta Parlamentario di MEP ta di pensamento cu mester hasi tur esfuerso posibel pa por incentiva inversionista y comerciantenan, tanto local como internacional, pa inverti den nos economia.

Den esaki Parlamento tin un rol importante como cu mester bin cu leynan cu ta proteha e derechonan di e usuario y comerciante, pa asina salbaguardia nan privacidad y derechonan riba internet.

 

Burocracia ta algo cu mester revisa tambe, door di duna inversionistanan local y internacional e mesun derechonan, y no beneficia ningun rib’e otro.

Daphne Lejuez ta kere cu hasiendo esaki, lo duna e inversionista internacional mas oportunidad pa nan inverti na Aruba, cual ta keda beneficioso pa nos economia.

Mirando cu Aruba ta pasando den retononan na nivel financiero-economico, mester hasi tur lo posibel pa incentiva y motiva inversionnan pa asina por produci mas placa tanto p’e caha di Gobierno y nos hendenan.

 

E pensamento di Parlamentario Lejuez ta cu mester trece innovacion den e diferente sectornan publico pa asina Aruba por yega na un economia stabil y creciente.

 

Leave a Reply

Top