Segun experto den industry crucero, Amilcar Cascais – Aruba tin tur loke mester pa sigui evoluciona e experiencia cu ta ofrece e turista crucero

Orador principal di e Cruise Symposium Aruba (CSA) 2017 tabata Sr. Amilcar Cascais, un veterano di e industria cu mas cu 25 aña di trayectoria.

 

E tema di su presentacion tabata ‘Con pa ta exitoso den e industria crucero’, cual contenido a duna un guia n’e participante y den cual el a elogia encuentronan cu ta incorpora miembronan activo den e industria pa traha y progresa hunto.

 

Entre e puntonan cu a trece dilanti, Cascais a enfatisa rib’e necesidad di renoba bo producto identificando su esencia, pero dunand’e un bachi nobo p’e keda competitivo.

“Boso tin un isla bunita; mester sigui ahusta e producto di un manera cu ta beneficia e industria y su necesidadnan. Asina ta haya un balor comercial mas grandi cu e industria lo kier sigui bishita y te hasta percura pa bishitanan adicional na Aruba,” Cascais a splica.

 

“Di loke mi por a wak awe, mi ta hopi satisfecho y te hasta impresiona pa mira con bon organisa Aruba ta compronde e necesidadnan di e industria. Si sector priva hunto cu esun publico mester asumi e reto di enfoca mas riba innovacion y ofertanan exclusivo, pa cual porcierto por cobra mas, tanten cu e balor di exclusividad / personalisa tey.

Na final di dia, industria crucero ta un negoshi y su proposito ta pa haci ganashi. Liñanan crucero ta bay unda cu e pasaheronan ta pidi pa bay, pero tambe unda cu ta mas rendabel pa nan mes”.

Cascais a comparti cu e participantenan di CSA 2017, con companianan crucero ta tuma nan decisionnan prome cu nan inclui un destinacion riba nan iterinario.

“Tipo di eventonan asina ta crucial”, segun e experto, cu ta kere cu ATA ta riba e bon caminda dor di percura pa sigui sinta na mesa cu tur partido envolvi pa evalua, dialoga, planifica y ehecuta un vision comun.

Top