Segun expertonan den Corte na Schiphol – Mitch Henriquez a fayece door di stress agudo cu a causa un paro cardiaco

Diamars mainta tabata e di dos dia di e huicio contra dos agente policial Hulandes, kendenan ta wordo persigui pa morto di e Arubiano Mitch Henriquez, kende a fayece na 2015. E expertonan cu a duna declaracion diamars mainta y media a bisa cu probablemente Henriquez a fayece di e consecuencianan di un sindroma agudo di stress cu a conduci na un paro cardiaco.

E caso tin atencion di tur media Hulandes y e por wordo sigui via twitter tambe di e periodista Saskia Belleman.

Un di e expertonan cu a wordo scucha e mainta aki tabata Patologo Soerdjbalie di Instituto Forensico Hulandes, kende anteriormente a bisa cu chocamento door di un nekklem tabata causa di morto, y el a keda para ariba su conclusion cu e chocamento tabata fatal pa Henriquez. E no ta descarta e sindrome agudo di stress, peor ta bisa alabes cu no ta por nada el a menciona esaki te como e di tres posibilidad.

Por sinti cu no solamente den Corte pero hasta den prensa, e informacionnan ta hopi suhetivo, unda cu por lesa comentarionan manera cu: loke e tres expertonan a trece ta dificil pa Ministerio Publico proba e acusacion di doodslag.  Den Telegraaf nan ta bisa cu pa “doodslag” mester demostra e intencion riba e asesinato, of mester demostra cu conscientemente e agentenan policial a tuma e riesgo cu e persona por fayece.

Nan ta relata cu e sindrome di stress agudo por a wordo causa door di diferente motibo. E uzo di violencia ta un di esakinan, pero tambe e uzo di alcohol of droga, falta di oxigeno, of un combinacion di esakinan. Un persona cu haya e sindroma ta agita, no ta sigui ordonan, y no ta reacciona riba “pijnprikkels”. Na dado momento esaki por resulta den un paro cardiaco.

Awo den e huicio e pregunta cu ta wordo haci ta si e dos funcionarionan policial por wordo teni responsabel pa morto di Henriquez. E expertonan tur ta di opinion cu e forsa uza door di e Polisnan a causa e sindroma di stress.

Ayera por a scucha e comentario di ex Parlamentario Desiree de Sousa Croes, kende ta na Hulanda pa presencia e huicio aki y e tabata di opinion cu Hues algun biaha tabata hinca palabra den boca di e agentenan, mustrando of dunando nan indicacion di kico nan mester bisa of contesta cierto preguntanan.

 

Siguiendo cu e tratamento di diamars mainta, e dokter forensico Daan Botter a bisa cu e Polisnan tabata seis minuut laat pa cuminsa cu reanimacion i e victima. Di otro banda ta bisa cu pashentnan cu sobrevivi e sindroma menciona, hopi biaha ta fayece algun dia despues.

Tabatin hopi discusion prome cu e caso a cuminsa si ta cera e portanan pa protege privacidad di e Polisnan, y finalmente a permiti Abogado di e famia presenta filmacionnan di e incidente den Zuiderpark. Tur hende por a nota cu e filmacionnan presenta door di Abogado Korver ta di un calidad hopi mas miho cu esnan uza door di Rijksrecherche pa compilacion pa e proceso.

Presidente di Corte a haya hopi remarcabel y a puntra di con despues di dos aña Rijksrecherche no a logra loke Abogado Korver a logra den 24 ora.

Esnan presente den e sala por a mira riba e imagennan cu e cabes di Henriquez ta pega den e brasa di Polis DH01, y ta cuminsa bira biña. Por mira tambe cu un Polis ta grita e hendenan den bisindario: “No haci joke encuanto arma di candela”, loke ta mustra aparentemente cu e Polisnan tabata sa cu Henriquez en realidad no tabatin un arma cune.

 

Leave a Reply

Top