Segun Gevolmachtigd Minister na Washington, sr. Andy Lee: Oportunidad igual pa studiantenan den henter Reino Hulandes

For di aña 2014, sr. drs. Andy Lee, Gevolmachtigd Minister pa Aruba na Washington, DC, a trece na atencion di Ministerie van Buitenlandse Zaken (Min BuZa) na Hulanda e problematica cu studiantenan di Aruba studiando na Universidad di Aruba no tabatin e mesun oportunidad cu studiantenan di Universidadnan y Hogescholen di Hulanda di core nan stage na Embahada di Reino na Washington, DC, USA.

For di e tempo ey el a tuma na su encargo pa yega na un solucion pa cu e falta di oportunidad aki. Min BuZa a reconoce e discrepancia den e regla bieu y hunto cu sr. Lee a traha duro na yega un solucion satisfactorio y beneficiante, resultanto den un regeling nobo di stage na juli 2016.

 

Oportunidad pa studiantenan di Aruba studiando na Aruba

Cu e regeling nobo aki cu a keda institui na juli 2016, studiantenan di Universidad di Aruba di nacionalidad Hulandes ta haya e posibilidad di core stage na Oficina di Gevolmachtigd Minister di Aruba staciona na Embahada di Reino na Washington, DC.

E regeling nobo awor ta habri posibilidad tambe p’e studiantenan aki core stage na tur Embahadanan y Consuladonan di Reino Hulandes den Westerse Hemisfeer, pues for di Canada te na Argentina como tambe na tur e posten den Caribe. Seguramente un oportunidad unico y beneficioso den diferente aspecto pa cu nos studiantenan.

 

Oportunidad pa studiantenan di Aruba studiando den regio, na Merca y Canada

Fuera di e grupo di studiantenan na Aruba, e mes un oportunidadnan aki a ser habri pa studiantenan di Aruba – di nacionalidad Hulandes – cu ta studiando na Universidadnan den regio, na Merca y na Canada.

Pues e studiantenan aki awor tambe por core stage na Bureau di Gevolmachtigd Minister pa Aruba na Washington, DC como tambe na Embahadanan y Consuladonan di Reino Hulandes den Westerse Hemisfeer.

 

Regeling nobo aplicabel pa Corsou y Sint Maarten

E mes un oportunidadnan cu a ser habri pa studiantenan di Aruba tambe ta aplicabel pa studiantenan di Corsou y di Sint Maarten. Awor tur studiante den Reino – di nacionalidad Hulandes – tin oportunidad igual.

 

Prome studiante di Universidad di Aruba ta pasa su stage exitosamente

Ta a base di e regla nobo aki, GevMin pa Aruba na Washington, DC, sr. drs. Andy Lee, trahando conhunto cu Universidad di Aruba, por a yama na januari 2017 bon bini n’e prome studiante for di Universidad di Aruba, srta. Jacky Florencio, cu a bin core su stage na Bureau Gevolmachtigd Minister pa Aruba, cu ta na Embahada di Reino na Washington DC.

 

Y ta cu sumo placer sr. Lee a participa tambe dia 23 di juni 2017, por medio di comunicacion via Skype, n’e parti culminante di estudio di srta. Florencio, esta e defensa di su tesis, cual tabata e stageopdracht cu el a haya for di sr. Lee. Jacky Florencio no solamente a haci un bon trabou durante su stage, pero alaves a skirbi un bon tesis y a sa di defende e tesis aki tambe dilante un panel di cuatro persona, consistiendo di sra. Esther Williams, sra. Esther Tiemens, sr. Angelo Brete y sr. Andy Lee. Un caluroso pabien ta bay na Jacky Florencio p’e bunita logro aki.

Ya e siguiente stagiaire di Universidad di Aruba ta preparando pa su stage na Bureau di Gevolmachtigd Minister pa Aruba na Washington, DC y su stageopdracht ta cla p’e tambe caba. Na augustus proximo lo yam’e bon bini na Washington, DC.

 

Profesionalisacion di nos studiantenan di Aruba

Ta for di basta aña caba cu Bureau Gevolmachtigd Minister pa Aruba na Washington, DC, a bin ta acomoda studiantenan Arubiano for di Universidadnan of Hogescholen di Hulanda.

Ta diferente studiante Arubiano, studiando na Hulanda a core nan stage exitosamente na Washington, DC.

Sr. Lee ta hopi contento y sumamente satisfecho cu por fin por ricibi tambe, desde e aña aki, studiantenan Arubiano di Universidad di Aruba y for di regio pa core nan stage na Embahada di Reino na Washington, DC. Alavez ta spera di por conta riba studiantenan di Aruba na Hulanda pa sigui aplica pa core stage na Washington, DC.

 

Desde awor tur Embahadadan y Consuladonan General di Reino den Westerse Hemisfeer ta habri pa tur nos studiantenan na Aruba como tambe nos studiantenan den regio pa haci nan stage na e organisacionnan aki. E stage regeling nobo awor ta ofrece na un grupo mas grandi di nos yiunan di tera pa por haya experiencia internacional na posten di Reino den Westerse Hemisfeer. Pa mas informacion encuanto stage na Bureau Gevolmachtigd Minister di Aruba na Embahada di Reino na Washington, DC por tuma contacto cu e bureau aki via WAS-GMA@minbuza.nl.

Top