Segun Melvin Tromp di AVP – Ta papia di fia placa na Hulanda prome cu a forma Gobierno

E politico cu pa añas a opone Gobierno di Mike Eman y kende solamente a sa di papia di ‘mega debe,’ awor ta sorprende declarando, prome cu el a huramenta mes como Minister, cu lo bay fia placa na Hulanda.

Melvin Tromp di partido AVP, ta mustra cu e falta di vision cerca e politiconan aki, ta bolbe resalta awor cu nan a logra di forma un gobierno.

“Ora cu pueblo scucha Xiomara Ruiz Maduro declara cu gobierno di MEP lo biaha pronto pa Hulanda pa busca placa pa atende e desaster financiero cu gobierno di AVP a laga atras, tin cu bisa cu ta un declaracion cu ta cuadra net na momento cu aki na Aruba ta duna inicio pa e temporada nobo di carnaval.

Un declaracion di Xiomara interesante pero na mes momento sumamente ridiculo caminda e ta confirma cu MEP a tuma un mandato di cual e no tin un ‘benul’ di kico esaki lo bira.

Ban ta franco, cu presencia di CAFT aki na Aruba, un comision cu e propio Xiomara hunto cu su lider di partido a biaha pa Hulanda pa roga  gobierno di Reino pa manda CFT bin kita autonomia financiero di nos pais, awor ta demostra cu nan no ta respeta e comision aki cu for di 2014 ta trahando aki riba nos isla.

CAF a controla y aproba mescos cu Parlamento di nos pais, tur presupuesto for di 2015 bin ariba y  confirma cu e maneho financiero di Gobierno di AVP, tabata cumpli cu su deber y responsabilidad  a base di palabracionnan haci, cu su presupuestonan.

No solamente CAFT pero otro instancianan manera IMF, Fitch Ratings y Standard & Poors, institucionnan financiero mundialmente conoci, a sostene e maneho di Gobierno di AVP pero awor diripiente sin ainda cu e gobierno di MEP a tuma gobernacion over oficialmente, ya caba ‘Minister to be,’ Xiomara ta preparando su biahe pa Hulanda pa presta placa pa MEP por goberna.

Aki pueblo tin cu pone bon nota, ya cu ta mesun Xiomara di MEP aki, tin ocho aña ta papiando di mega debe, cu nos yiu- y nietonan lo tin cu paga e mega debe aki pero su prome vision den su proximo funcion como Minister di MEP, ta di bay presta placa na Hulanda.”

Melvin Tromp di partido AVP ta señala.

 

 

Leave a Reply

Top