Segun Mervin Wyatt-Ras di AVP: Despues di a ricibi un carta 4 luna pasa, MEP hunto cu POR y RED a pidi reunion urgente encuanto Hospital

Durante conferencia di prensa di AVP, Parlamentario Mervin Wyatt-Ras, a indica cu na luga cu e coalicion di MEP-POR-RED concentra den forma nan Gobierno, nan ta yama reunion pa kita hende fo’i trabou, y pa purba stop proyecto di Hospital.

Esaki despues di 4 luna cu un carta di Minister di Salud, Alexa Schwengle, a manda pa informa Parlamento encuanto Hospital.

 

Wyatt-Ras ta trese dilanti cu e proyecto di renobacion y construccion di Hospital ta data di basta aña.

Na januari 201,3 pa medio di un ley cu a trata den Parlamento, a duna apoderacion pa haci e trabounan necesario.

Na diferente ocasion, tanto Hunta di Directiva di hospital como tambe SOGA, a duna presentacion na Parlamento tocante e aspectonan financiero y di infrastructura, servicio y cuido.

 

Na juni di e aña aki, un carta a drenta Parlamento dirigi n’e comision encarga cu Asuntonan Social y Salubridad cu e peticion pa Minister di Salubridad duna informacion tocante desaroyonan rond di Hospital.

Dia 12 di october a drenta un otro carta dirigi na Presidente di Parlamento cu e peticion pa informa Parlamento tocante e ultimo desaroyonan. Den e carta aki ta splica cu e huur di e edificio lo subi cu 417 mil florin pa luna.

A base di art. 2 inciso 3 di e ley pasa den Parlamento dia 17 di januari 2013, Gobierno ta cumpliendo cu su deber di informa Parlamento.

Den e ley aki ta apodera Gobierno pa, entre otro, adapta e huur anualmente.

 

Den e Reunion di Comision Central yama dia 20 di october, e Presidente di e comision encarga cu Asuntonan Social y Salubridad, kier a impedi pa trata e carta di dia 12 di october den dicho reunion, y a sali na cla cu e Presidente di e Comision ey riba su mes, sin consulta cu su comision ni cu su vice-presidente di su Comision, a dicidi pa no reuni cu Minister.

Esaki, segun Wyatt-Ras, no ta cuadra cu procedura di trata cu documentonan cu drenta Parlamento.

Aki lo mester a trata e carta cu Minister a manda na juni y duna conseho por escrito na Centrale Commissie pa ser trata y manda pa Minister. Esaki e señora en cuestion no a haci.

Na final di e reunion di Comision Central e Presidente di Parlamento di e tempo ey, a laga e oportunidad habri pa miembronan por haci pregunta y duna comentario, y hasta a duna oportunidad pa nan haci esaki por escrito y a fiha un deadline p’e dialuna siguiente, pa entrega esakinan.

 

Pa con straño cu esaki por zona, e Presidente di e comision despues di no kier yama reunion pa haya informacion, a dicidi toch di manda pregunta pa Minister.

Wyatt-Ras ta menciona cu su persona, mescos cu otro miembronan di Parlamento, a sigui e proceso di construccion y renobacion di hospital na un manera critico, y e Minister semper a bin splica ora a yama pa haci esaki.

 

“Ta incomprendibel con awor, despues di 4 luna cu a ricibi e peticion di Minister pa duna splicacion, e fraccionnan a lanta fo’i soño y ta pidi reunion publico.”

Wyatt-Ras ta spera cu nan lo ta mas diligente cu e interesnan di pueblo, patientnan y trahadornan di hospital, cu por cierto ta masha contento cu nan por a cuminsa traha den un parti nobo pa atende patientnan.

Wyatt-Ras ta manda palabra di felicitacion pa nan.

 

 

Leave a Reply

Top