Segun Parlamentario Clarisca Velasquez (AVP): Aruba riba e bon rumbo

“Despues cu e Gobierno aki a tuma rienda di e pais aki na 2009, nos isla tabata den deterioro total y nos hendenan sin perspectiva pa futuro. Un infrastructura completamente decai y edificionan di Gobierno bandona na nan suerte! Nos turismo cu tabata falta hopi pa nos por promove mas crecemento, nos refineria sera pa falta di vision di e Gobierno anterior na esaki, nos fondonan di pensioen APFA, AOV/ SVB na rand di bancarota, AZV cu mester a wordo reforma y nos aparato di Gobierno cu gastonan halto”, segun Parlamentario Clarisca Velasquez.

 

“E Gobierno Mike Eman I a lora manga y a cuminsa traha pa pone e isla aki riba pia atrobe.

Pero prome mester a duna nos hendenan alivio den nan poder di compra y aki ta unda e ser humano a haya su atencion apesar di situacion malo cu a haya Aruba financieramente.

A cuminsa inverti en bes di exigi den nos ciudadanonan di menos recurso p’asina nos hende por haya alivio y tambe pa Aruba su economia por cuminsa draai”, e Parlamentario di AVP ta splica.

 

“E modelo cu Gobierno Mike Eman a scoge ta pa stimula economia p’asina stabilisa nos pais, pa despues ahusta e gastonan publico en bes di scoge un sistema di austeridad riguroso cu mayoria pais, incluyendo Hulanda, a impone riba nan comunidad.

Awe nos tur por mira e resultadonan positivo. Awe Aruba mas bunita cu inversionnan riba infrastructura y atraccionnan turistico y tambe den barionan. Nos hendenan cu mas placa den nan saco cu impulso den nos poder di compra cu prosperidad comparti y tambe reduccion di pago di coriente”, Parlamentario Velasquez ta continua bisando.

 

“Y cu un finanza publico sostenibel. Un cifra di desempleo awe di alrededor di 5% cu na 2009 ora a tuma mando tabata na 12%. Un finanza publico bon balansa cu un deficit di solamente 0,5% den 2017 y cu miras pa un presupuesto balansa y surplus den aña 2018.

Un refineria awe habri cu ta estimulo grandi pa nos economia y pa trabao pa nos hendenan.

Awe nos fondonan di pensioen tur ta salba y stabil pa generacionnan cu ta bin. E Gobierno aki a cumpli cu tur e puntonan cu banco central a pone na aña 2009 como reto pa por logra un miho Aruba y awe Gobierno a logra tur esakinan”, e Parlamentario a mustra.

 

“Aruba ta riba e bon rumbo y awe nos tur por wak cu nos propio wowo unda nos placa ta bay. Hasta Hulanda mester a admiti cu loke e Gobierno di Aruba a haci pa pone Aruba bek riba pia ta e miho decision cu un pais por a tuma. Aruba ta ehempel pa henter reino Hulandes y nos tur ta orguyoso di esaki”, Parlamentario Velasquez a conclui.

Top