Segun Parlamentario Jennifer Arends-Reyes: Tecnologia den Enseñansa lo ta un avanse pero ta un parti chikito di cambionan structural cu lo mester sigui wordo implementa

Parlamentario Arends-Reyes tabatin 10 aña di experiencia di trabou na Colegio Arubano y 4 aña na Hulanda prome cu e la drenta arena politico. Durante 4 aña di Parlamento ta diferente mocion su persona a presenta na beneficio di e. o. muchanan y hobennan.

 

Awe cu ta aña di eleccion por tuma nota cu diferente partido politico y politiconan ta trece nan vision pa Enseñansa. Mester bisa cu hopi ta enfoca riba tools y uzo di tecnologia, pero e realidad ta cu tin hopi trabou ainda pa haci den Enseñansa, y tecnologia lo ta un parti pero no tur cos ora ta papia di e cambionan ainda cu falta pa Aruba.

Sigur tin espacio pa tur plan awo pero e realidad ta cu ta hopi a ser inverti den Enseñansa pa aña, si por ta exacto mas cu 270 miyon pa aña cu ta 20% di nos presupuesto total y cu ta hiba nos na top 3 di mundo den parti di percentahe cu ta inverti den Enseñansa.

 

Cualificacion inicial y aumento di edad di Enseñansa obligatorio ta un punto cu semper Parlamentario Arends-Reyes a trece dilanti mirando cu e lo ta e siguiente paso den locual nos tin actual. Summer School lo mester bira un concepto normal na Aruba caminda cu ta duna un ultimo chens pa pasa un vak p’asina evita e fenomeno di ‘keda sinta’, perde ful un aña y baha e mucha of hoben su autoestima. Esaki lo mester bay man den man cu mas guia y remediëring den klas mes cu ayudo cu klassen assistent.

 

Diagnostico na tempo y e trahador socialnan mester ta cerca di e scolnan pa reenforsa e trabou di maestronan. Cluster 2 pa muchanan cu un of otro discapacidad manera problema di oido mester wordo reenforsa. Muchanan cu tin autismo lo mester por haya mas recurso y mester sigui cu e convenio cu a wordo firma pa explora e posibilidadnan pa Aruba.

Scolnan cu ta uza e metodo di Montessori lo mester wordo observa di cerca pa wak kico lo por siña di nan pa muchanan cu no por logra den Enseñansa tradicional. Habri e scolnan despues di 1:30 pa ofrece actividadnan extra curicular y traha cu diferente Ministerio pa logra p’esaki ta exitoso y contribui na formacion di e generacion nobo.

Introduci un meldcode uniforme pa tur persona cu ta traha cu mucha y hoben. Tambe sigui cu un maneho di droga estricto pa droga keda leu di scolnan. E. o. alimentacion, nutricion, amor pa bestia y naturalesa y e balor di sostenibilidad lo mester ta un parti integral di Enseñansa p’e proximo añanan, segun e Parlamentario.

 

Nos studiantenan den region Norte America y Hulanda tambe lo mester sinti cu aukue nan ta leu Aruba ta keda cerca sea ta via Arubahuis of otro personan designa pa duna nan un servicio di calidad. Preparacion y traha estrecho cu e demanda di nos mercado di trabou mester keda algo pa traha riba dj’e. Maestronan lo mester bay traha cu gana na scol y sigui brinda nan e facilidadnan y oido p’asina nos sigui hiba nos futuro generacionnan dilanti, Parlamentario Arends-Reyes ta termina bisando.

Leave a Reply

Top