Segun Parlamentario Melvin Tromp, Criminalidad a baha cu 50% compara cu bou Gobierno di MEP

Parlamentario Melvin Tromp durante reunion publico riba criminalidad, a mustra cifranan oficial riba criminalidad, cu ta confirma con bou di Gobierno di AVP, criminalidad a keda reduci cu casi 50% compara cu e periodo cu partido MEP tabata den Gobierno.

  1. o. e Parlamentario a mustra cu e informacion ta mustra cu pa loke ta trata e lista cu ta encera entre otro ladronicia, destruccion, maltrato y otro delitonan, na 2007 esaki a yega na e total di 6277 caso mientras cu na final di e prome periodo di gobernacion di Gobierno di AVP, esaki a baha te na e total di 3613 cu ta 50% cu ta mustra e gran diferencia entre e maneho cu a ser hiba.

 

Pa tal motibo Parlamentario Tromp ta lamenta e forma con miembronan di oposicion, principalmente esunnan di fraccion di MEP cu den nan afan pa gana interes di votadonan den e actual campaña electoral, ta trata di spanta comunidad cu informacionnan incorecto y negativo, caminda pa gran parti e propio partido MEP a hunga un rol grandi den henter e proceso negativo na cual nan mes ta referi na dj’e.

 

“Si nos tuma p. e. e total di casonan criminal na 2007 cu a alcansa e cantida di 6277, esaki a keda reduci te na 1580 na 2010 cu ta mustra con den tres aña di tempo trahando cu seriedad y responsabilidad, por atende cu criminalidad manera mester ta.

Mientras cu fraccion di MEP y PDR ta trata di pinta un scenario politico pa loke ta Husticia, cifranan cu tin disponibel pero cu ta confirma e cambio grandi cu a surgi rib’e tereno aki desde cu Gobierno di MEP a wordo manda cas na 2009”, segun Tromp.

 

“Durante di henter e reunion aki nos por a tuma nota cu miembronan di oposicion no tin ni un tipo di aporte pa duna algo mas di contenido na e tremendo lucha cu autoridadnan hudicial ta hibando contra criminalidad, caminda mas cu nunca casonan aki ta wordo atendi y soluciona pa polisnan.

Argumentonan sin contenido sigur ora cu Minister di Husticia informa Parlamento cu desde 2009, Gobierno a inverti mas cu 60 miyon extra den presupuesto di Husticia, cu ta bolbe confirma e seriedad cu Gobierno di AVP ta atende cu e asunto aki.

Ora cu nos scucha un miembro di oposicion papia di e falta di helicopter ta bon pa mustra cu durante di gobernacion di MEP e helicopter tabata lanta vuelo despues cu e atraco tuma luga pa yuda den buskeda di e malhechornan y na ningun momento esaki ta hunga un rol preventivo den henter e proceso aki”, Tromp ta splica.

 

“Na varios ocasion y tur momento cu a pidi Minister Dowers bin Parlamento pa duna informacion riba su maneho, e mandatario a haci esaki y gran parti di miembronan di oposicion, no sa duna acto di presencia durante di e reunionnan informativo  aki.

Ta weganan cu ta mustra e falta di seriedad cu tin cerca esunnan di oposicion cu simplemente kier hunga weganan politico cu un asunto asina delicado y asina serio.

Preguntanan cu a ser haci na Minister di Husticia di parti di oposicion, ta preguntanan sin sentido y cu ta dirigi pa haci politica barata riba e maneho di husticia y nos ta lamenta esaki profundamente.

Minister Dowers hasta a presenta un conseho di Gobierno di MEP caminda nan ta reconoce cu criminalidad a aumenta barbaramente bou maneho di nan Gobierno y awe ta pretende di ta e prome nan den liña pa lucha pa husticia. Tin documentonan oficial pa confirma tur esaki”, Parlamentario Melvin Tromp a trece dilanti.

Top