Segun participantenan: Conferencia di Dia di Hende Muhe 2017 tabata un experiencia hopi unico y inspirativo

Brigitte Dijkhoff, kende tabata entre e 800 personanan cu a atende e Conferencia di Dia di Hende Muhe organisa pa Ministerio di Enseñansa, a describi e evento como un experiencia hopi bunita pa su caracter personal-emocional.

 

Dijkhoff a describi e conferencia como uno hopi interesante, y cu el a trece cu ne hopi motivacion y inspiracion. El a agrega cu no ta facil pa comparti experiencianan asina personal di nan bida cu publico, y cu admiracion a laga sa cu nan a crea un bunita experiencia pa tur esunnan presente.

Como un “public speaker” kende ta ofrece seminarionan di autoestima na tanto adultonan como muchanan, Mimi Williams ta traha cu CEDEHM (Centro pa Desaroyo di Hende Muhe).

 

El a expresa cu e ta emociona, y a siña hopi. “Nunca bo ta caba siña den bida,” el a bisa, agregando cu tin hopi hende muhe cu mester di sesionnan manera e conferencia aki pa yuda nan cu nan motivacion.

Trahando cu CEDEHM pa algun aña caba, Williams a nota cu un cos hopi importante cu hende muhenan mester siña, cu tambe a keda refleha pa e oradornan, ta cu ta tempo pa hopi hende muhe siña bisa “nos ta importante den tur sentido di e palabra, como mama, como yiu, y como hende”.

 

Hopi biaha e hende muhe no ta consciente di con importante e ta y “stima su mes” ta algo cu e mester siña. Tur hende cu a papia a bisa esaki tambe, ta tempo pa e persona stima su mes mas, el a conclui bisando.

 

Por a sinti sigur entre e damanan, y e poco cabayeronan, cu a participa na e evento aki riba dia 8 di maart cu e Conferencia di Dia di Hende Muhe ta un evento importante pa su motivacion y inspiracion, pa e forma cu ta encurasha union y sosten entre y e desaroyo di autoestima denter di cada hende muhe, como tambe e apoyo cu e hende homber por brinda na e hende muhe pa cu su desaroyo personal y profesional.

Leave a Reply

Top