Segun proposicion di ley di Dangui Oduber No tin luga den e prome dies riba lista di MEP pa Ady Thijssen

Trahamento di lista di partido MEP ta confrontando problema serio den e propio seno di e partido geel, ya cu fuera cu na e momentonan aki tin discusion formal entre algun candidato cu kier mira nan mes na e puesto number 2 rib’e lista geel, tin otronan cu pa hopi aña pa tradicion ta den e lista pero cu lo tin cu entrega nan posicion aki.

Manera ta conoci, luna pasa Dangui Oduber a entrega un proposicion di ley na Parlamento caminda ta boga pa cambia henter e sistema di ‘kiesverordening’ caminda lo kita for di e situacion cu tin na e momentonan aki, pa habri caminda pa laga esunnan cu mas voto drenta den Parlamento.
Ora cu tuma na consideracion contenido di e ley di Dangui, por anticipa cu pa e veterano Ady Thijssen lo no tin luga mas den e prome dies riba e lista di MEP mirando e total di 475 voto cu el a ricibi den eleccion di 2013.
Tin varios candidato cu a haya mas voto cu Ady den ultimo eleccion y aki ta trata di Edgard Vrolijk cu 586 voto, tin Shailiny Tromp Lee kende a logra 574 voto y tambe Jan Hendrik Croes kende a acumula e total di 509 voto, cu ta mucho mas cu loke Ady a logra.
Un di e candidatonan aki lo por tuma e puesto number 7 cu tabata di Edison Briesen y e dos otronan lo haya puesto 9 y 10 riba e lista, cu den ultimo eleccion tabata ocupa pa Carl Giel y Mario Werleman.
Esaki ta nifica cu Ady Thijssen lo bay cay te na di 11 puesto riba e lista geel pa proximo eleccion cual lo bay nifica finalisacion di su carera politico.

Otro problema serio cu partido MEP tin pa formacion di su lista pa proximo eleccion, ta e hecho cu tin tres candidato cu lo exigi pa puesto number 2 rib’e lista geel cu ultimo eleccion tabata riba nomber di Chris Romero, kende a logra 1273 voto personal.
Tanto Xiomara Ruiz Maduro como Dangui Oduber lo ta anhelando e number dos aki rib’e lista geel y si aki sigui e mesun contenido di cambio di ley cu Dangui a presenta na Parlamento, ta mas cu claro cu Xiomara tin cu bira number dos a base di su total di 2445 voto cu el a logra na 2013 y Dangui Oduber lo tin cu haya number 3 rib’e lista cu su 1749 voto cu el a ricibi, bahando Romero te na di tres puesto rib’e lista.
Dado caso si Glenbert Croes dicidi cu e kier un puesto riba di e lista na luga di 29 cu e tabatin ultimo eleccion, esaki lo bay nifica cu Glenbert lo bira number 3 riba lista di MEP a base di su 2371 voto cu el a haya den eleccion di 2013.
Tin candidatonan nobo tambe cu a pone como condicion un puesto halto rib’e lista y loke por a compronde den esaki ta cu nan exigencia ta pa keda den e prome shete di e lista, a base di e cantidad di asiento cu MEP a logra den ultimo eleccion.

E pregunta mas grandi cu tanto den seno di MEP como e circulo politico ta ser haci, ta e situacion en torno di e candidato number 4 den eleccion 2013, esta Guillfred Besaril, kende no a bin resulta e politico cu tanto e partido a spera di dj’e.
Su falta di participacion den e arena politico na nomber di e partido tabata masha limita mientras cu el a haya su mes envolvi den un caso di hit & run pa cual e no a wordo persigui mientras cu tin un otro caso sumamente serio cu ta ser menciona contra di su persona, pero cu partido MEP ta bon na altura di dj’e y consecuencia cu esaki lo tin pa interes di e partido si tur cos rementa durante di e actual campaña electoral. Pues hopi duda ainda den kico lo sosode cu e lista di partido MEP.

Top