Segun Rene Herdé: Plasterk ta confirma cu Aruba a sali di e crisis financiero y economico riba propio forsa

“Aruba a sali di su pio crisis financiero y economico den historia riba propio forsa. Riba tur criterio financiero y economico, Aruba ta miho para awe cu e otro tres paisnan di Reino. Aruba no a haya saneamento di debe manera Corsou y Sint Maarten.

 

Tampoco Aruba tin aceso na financiamento publico na un interes di 1 pa 1.5% manera Hulanda, Corsou y St. Maarten si ta haya. Sin embargo si bo wak unda e cuatro paisnan di Reino tabata na 2009 y unda nan ta awe, bo ta yega na e conclusion cu contrario na e otro tres paisnan, Aruba a sali di e crisis cu tabata pio cu e otro tres paisnan y a logra un resultado miho cu e otro tres paisnan.

Anto Aruba a hacie riba propio forsa!”.

Asina Rene Herdé di e fraccion di AVP a bisa awe den e conferencia di prensa di e fraccion di AVP den Parlamento di Aruba.

 

CRITERIONAN CRUCIAL

Segun e cuatro criterionan cu mas ta wordo uza pa evalua e situacion financiero y economico di un pais, Aruba a haci e adelanto di mas grandi den Reino…anto riba propio forsa!

Crecemento economico na Aruba tabata NEGATIVO -13% na 2009. Awe e ta na positivo 5% pa 2017. Debe nacional a aumenta, pasobra cu Aruba a fia placa pa inverti den nos pais pa sali di e crisis.

Y nos a logra! Desempleo tabata 11.6% na 2009. Cu trabounan nobo na e refineria na 2017 y 2018 esaki lo sigui baha te bou di 6%. Na 2009 e deficit riba presupuesto tabata halto dor caida grandi den entrada y gastona halto. E aña aki e ta sigui baha te 0.5%.

 

NOS NO TA CLA

Riba e pregunta si esey kiermen cu cos ta bon na Aruba of cu Aruba ta cla, Rene Herdé a contesta categoricamente.

 

“No. Nos no ta cla. Si bo compara unda nos tabata na 2009 cu unda nos ta awe, nos a logra drecha hopi cos pa nos pais y nos hendenan y nos a crea seguridad y oportunidadnan nobo pa hopi hende. Pero nos no ta cla. Pasobra nos kier yega na un situacion di un presupuesto sin deficit.

Nos kier pa tur hende cu kier traha, haya trabou y gana su propio entrada. Nos kier pa e progreso cu nos pais haci, yega na cas di cada famia y no keda pa un grupo chikito so. Nos kier e desaroyo economico ta mas amplio, mas diverso y cu ta cuida medio ambiente mas”, Rene Herdé ta splica.

 

“Kiermen cu e desaroyo mester mas berde, mas sostenibel y cu mas oportunidad pa hobennan cu kier tuma responsabilidad pa nan mes y pa nos pais.

Awe nos tin un infrastructura fisico di waf te cu hospital, scolnan y cayanan, den miho condicion cu nunca antes den nos historia. Nos a segura e entrada di miles di trahado di gobierno, den enseñansa y di miles di pensionado. Nos a kita riesgonan financiero grandi y crea seguridad di trabou y entrada pa miles di trahado.

 

Awe Aruba ta mas resistente contra crisisnan den mundo. Ta rib’e base mas solido aki nos ta bay sigui crea e seguridad di trabou, entrada, perspectiva pa hobennan y trankilidad pa nos trahadornan y nos grandinan. Nos trabou pa e benidero añanan ta masha cla. Mas cu te awor, e progreso mester yega na tur hende den tur cas na Aruba! Nos criterionan no ta solamente financiero. Nos midinan ta conta pa henter nos pais y pa tur hende. Na final henter pueblo mester sinti e progreso di Aruba den nan cas!”, Rene Herdé a duna di conoce.

Top