Segun resumen di Relato Mensual di januari 2017 di Banco Central Mientras cu turismo for di Latino America a baha, e mercado Norte Americano si ta sigui crece

Na januari 2017, e cantidad di turista a registra 89.269 bishitante, cu tabata 14,2 porciento (-14.803 bishitante) menos cu na januari 2016.

E caida aki a resulta principalmente dor di un bahada den e mercado Latino Americano di 50,0 porciento (-18.203 bishitante). Di otro banda, e mercado Norte Americano a crece cu 8,9 porciento (5.033 bishitante).

E caida den e mercado Latino Americano a wordo causa pa menos bishitante for di Venezuela (-19.056 bishitante of -68,2 porciento).

E subida den e mercado Norte Americano a resulta mas tanto for di un expansion den bishitante for di Merca (+4.279 bishitante of 8,4 porciento).

 

E cantidad di turista crucero a registra un caida di 11.800 bishitante of 11,6 porciento te na 89.734 na januari 2017, compara cu januari 2016.

E cantidad di barconan a baha, for di 52 na januari 2016 pa 44 na januari 2017.

 

INFLACION

E nivel general di prijs, cu ta wordo midi dor di e indice di prijs di consumo, a registra un bahada di 0,4 porciento den e luna di januari 2017, compara cu januari 2016.

E contribuyente principal n’e caida aki t’e componente “Vivienda”, cu ta debi primordialmente na un reduccion den prijs di electricidad.

Tambe, e componentenan “Paña y Sapato” y “Recreacion y Cultura” a contribui n’e caida aki.

 

Di otro banda, e componentenan “Transporte”, “Mobilario” y “Restaurant y Hotel” a registra un subida. Si exclui e componentenan di cuminda y energia for di e indice di prijs di consumo, inflacion ta mustra un crecemento di 0,2 porciento compara cu januari 2016.

Pa loke ta trata e promedio anual di e tasa di inflacion, esaki a keda mescos na -0,9 porciento na januari 2017, compara cu december 2016.

 

ENTRADA DI GOBIERNO

Tuma nota cu e cifranan di entrada di Gobierno no tabata disponibel na momento di publicacion di e relato aki.

Leave a Reply

Top