Según un experto for di principio di construcción di Bushiri Hotelvakschool “Tin biaha ta mihor será boca, pa no pasa pa bobo”

 

Un par di observacion riba e articulo cu boso a publica riba pagina  17 di boso edición di dia 8 di september 2017, di un persona masha yega for di inicio di e proyecto aki y pesey ta bon pa coregi informacionnan eroneo.

Atrobe sr. Alonsio Geerman ta bisa algo cu e no ta substancia, a sabiendas cu e no ta corecto pa después sconde tras di e hecho “cu esey a pasa prome cu su tempo como Presidente di SAHTCC. Anto pakico bo ta pretende esey?

E proyecto di Hotelvakschool a wordo identifica y inicia den añanan 80 di e siglo pasa; porcierto poco dia pasa Amigoe a publica un potret y articulo di Evert Dongen caminda sr. Ellis Dania ta ricibi reconocimento pa su empeñonan pa train Arubianonan pa traha den nos industria tursitico.

 

E tempo ey Aruba ainda tabata parti di Antiyas Hulandes y programanan pa ayudo di desaroyo tabata wordo canaliza y coordina dor di Departement voor Ontwikkelingssamenwerking [DOS] (Departamento pa Cooperacion di Desaroyo) di Pais Antiyas Hulandes.

Den cuadro di programanan di desaroyo, Aruba a haña ayudo di UNDP (United Nations Development Program) cu a pone e experto Israelito Zev Levine disponibel pa traha conhuntamente cu expertonan local, si e no ta robez  hunto cu Ellis Dania, Betty Arends, Charlie Ibarra, Jaap Beaujon y otronan, riba e curriculum y programa van eisen pa un Hotelvakschool cu lo a consisti tambe di 50 kamber di hotel caminda e studiantenan di e hotelvakschool lo por a haña experiencia técnico y practico.

 

Departamento pa Cooperacion di Desaroyo (DOS) en estrecho cooperación cu DECO di Aruba a traha e projectdossier pa por entrega e proyecto pa financiamiento dor di EOF. E expertonan di desaroyo envolví tabata sra. Miriam Buckley di DECO y sres. H. Schröder y Herman Bergh, kendenan tabata traha na DOS den cuadro di ayudo técnico for di EOF (Europees Ontwikkelingsfonds).

E proceso a dura como 5 aña, prome cu por cuminza di cu e construcción di proyecto.

E Hotelvakschool y e 50 kambernan di hotel a wordu diseña conforme y a cumpli cu tur reglanan di Brandweer Hulandes, Antiyas Hulandes y di Aruba.

E proyecto di Hotelvakschool a cumpli cu tur e reglanan y tambe di e Bouw- en Woningverordening di Aruba y consecuentemente a haña un permiso di construcción y di Hindervergunniing.

Tambe t’asina cu prome cu por a tene e destaho publico p’e construcción di e proyecto, EOF, EEG/EOF den nan calidad di financiador mester duna aprobación tecnico y hurídico di plannan.

 

E proyecto a wordo diseña dor Associated Architecs Aruba den cooperación cu Associated Architecs y ASCON Curaçao. ALBO-Bonbocemi for di Bonaire a gana e destaho publico y tabatin Unicon y Arubaanse Wegenbouw como sub-contrartistan; Associated Engineers & Partners di sr. ing. Tico Petronia tabata encarga cu supervision diario y Project Management.

Pa loke ta trata e sistema di incendio di añanan 80, e sistema conforme cu e leynan existente e tempo ey, mester a percura y provee suficiente trapi y rutanan di escape den e compleho, fire hoses, fire extinguishers industrial den e cushinan, brandblussers den henter e hotel etc.

Ta te na añanan 90, después di candelanan feroz den mega hotels na las Vegas y Puerto Rico, Brandweer Aruba, a introduci e sistema di sprinkler installatie basa riba NFPA Standard di Merca.

Den comienzo Brandweer Aruba tabta exigi sprinkler solamente den hotelnan mas di 3 piso, pues e 50 kambernan di e hotelvakschool no tabata cay bao di e ley di sprinkler.

P’awor bin bisa cu pa instala sprinkler a costa 4 miyon florin, ta masha hopi placa, siendo un hotel tiki mas grandi cu Bushiri, su instalación di sprinklers a costa 2 miyon florin so.

 

Aruba den Reino tabta e prome país cu a exigi y a implementa e condición di sprinkler installations den plantanan hotelera. Brandweer a duna tur e hotelnan existente un periodo di gracia denter di cual mester a instala sprinkler systems, e fecha ultimo pa tin e fire sprinkler system operación tabata final di 1994.

Hotelvakschool Bushiri no tabata un excepción; comokiera cu mientrastanto a extende e Bushiri Hotel cu 100 kamber ubica den un tore di 4 piso. Bohama N.V. tabata encrga cu e construcción cual a wordo financia dor di Hulanda, den cuadro di e programa di ayudo pa desaroyo Hulandes.

 

Ta hopi infantil pa bisa cu EEG no ta existi mas, p’esey no mester tin miedo cu Union Europeo lo por ta malcontento cu loke a pasa cu e Hotelvakschool. E proyecto a wordo financia dor di EOF, cual si e remitente no ta robez, ainda ta existi y ta dunando ayudo di desaroyo.

Den cuadro di program di EOF nan a financia p.e. e restauaracion di e cas di Dundun Ecury, a pone € 10 miyon disponible pa enseñanza na Aruba.

 

Di unda persona, kende tabata Presidente di SAHTCC ta lanza acusación infunda riba e proyecto, e persona ey ta acusando EOF y EU indirectamente. Expresionnan descabeya di un ex–político, y un ex-Presidente di SAHTCC lo por perhudica Aruba den su futuro relación cu EOF y EU.

Pa loke trata e contacto y relación cu e doño di Aruba Real Estate I, II y III (actual Holiday Inn Resort), kende según sr. Alonsio Geerman tabata kier a paga Afl. 13 miyon pa Bushiri, lo ta bon pa sr. Geerman splica e lectornan di AWEMainta y pueblo di Aruba, con un persona o compañía cu lo tabata dispuesto pa paga 13 miyon pa Bushiri, no tabata tin placa o/y no tabata kier a paga e empleadonan di Bushiri Hotel, pa cual Lionstone tabata responsabel, Afl. 240.000,- di X-Mas bonus y parti di sueldo di fin di aña?

E hecho di no kier a paga e bonus a wordo publica y comenta den diferente corant local.

 

Por ultimo ta bon pa Alonsio Geerman sa, por si acaso e por a lubida, cu e expansion di Bushiri cu e toren di 4 piso cu ta contene 100 kamber ta un proyecto di e prome Gabinete Henny Eman, pues si toren ey no tabatin sprinkler ta Gobierno di AVP y Henny Eman, opdracht duna architecto y ingenieronan duna na comienzo di 1988 y trabaonan a cuminza den 1989 y a dura te fin di 1990. Cu otro palabra Alonsio Geerman ta critica e propio Henny Eman y AVP, awor so falta pa bisa cu esey ta prome cu su tempo. Te aki e reacción riba e articulo di Alonsio Geerman, ex Presidente di SAHTCC.

 

 

Leave a Reply

Top