SEPPA na ocasion di 1 mei, Dia di Trahador: Situacion na Aruba p’e clase trahador ta keda dificil

E aña aki nos ta recorda 131 aña di lucha di e martirnan di Chicago, na unda lidernan sindical a ofrece nan bida pa conkista derecho di trabao di 8 ora, demostrando forza y grandeza.

Mundo henter ta recorda e dia aki, dunando muestra di gradicimiento na tur esnan cu a hiba e lucha aki. Nos ta recorda y reflexiona cu hopi alegria cada logro cu ta faborece derecho di trahadornan.

Hopi trahador no sa o a lubida sucesonan di un dia manera 1 mei 1886.  Nos mester ta agradecido n’e lucha aki cu a wordo hiba y mas ainda gradici cu ainda tin hende eyfor cu desde diferente espacio cu nan ta encontra nan mes ta sigi cu e compromise di lucha, p’asina homber y muhernan tin trabaonan decente y oportunidadnan igual.

 

Awendia ta hopi nos mester repasa riba dje, e lucha di ultimo añanan, desaroyonan actual, adelanto y fracasonan. Situacion na Aruba p’e clase trahador ta keda dificil. Ta un constante lucha pa logra apenas algun beneficio aki aya p’e trahador, segun Secretario General di SEPPA, sra. Magaly Brito.

Rond mundo cosnan ta cambiando, asina nos por mira hasta discusion cu a tuma lugar na comienzo di april riba e tema di trabao den futuro. Tema importante.

 

E cambio di 8 ora pa 9 ora di trabao pa dia e bay contra e lucha di 131 aña pasa.

Eyfor e trahador ta sclama p’e cambio aki cu tabata dirigi pa yuda e dunador di trabao, pero cu a bay directamente contra e lucha di 131 aña pasa.

Mas peor ainda, e cambio aki a hiba e trahador na un dia di trabao mas largo, mas duro. Den algun caso, hasta e derecho pa tin un ½ ora liber di sosiego durante ora di trabao ta wordo nenga. Den mayoria di e caso esnan cu tin cu traha 9 ora pa dia di baina ta goza di un salario minimo, ya cu si hasta akinan e dunador di trabao por a haci cambio e lo a hacie na desbentaha di e trahador.

 

Kier kita e subsidieregeling di trahador di fundacionnan: Yamada pa conflicto!!

Aña pasa caba SEPPA a mustra riba e intencion di Gobierno pa trece cambio den e “Richtlijnen Subsidiabele Regeling” pa fundacionnan.  Esaki t’e resultado di discusionnan di añanan nobenta na unda SEPPA a negocia cu Gobierno di MEP e tempo aya, diferente condicion laboral riba cual Gobierno tin obligacion pa subsidia e fundacionnan.

Un logro, riba cual te cu dia di awe a sigi traha riba dje. A mehora cu tempo y awendia e trahador di e fundacionnan ta goza di e mesun beneficionan cu un empleado publico.

 

Gobierno por bisa e kier cambie, pero nunca lubida cu esaki tabata un acuerdo di SEPPA cu e Gobierno di e tempo aya, nunca den forma unilateral. E trahador ta trankil, tanten cu ta cumpli cu tur loke e tin derecho ariba dje !!

 

AÑA 2017 E TRAHADOR MESTER T’E REY Y REINA PA MAS CU UN DIA!!!

E aña aki, nos ta dilanti eleccion pa un Gobierno cu ta haya e mandato pa dirigi nos pais. Manera ya t’e sistema, e periodo aki, e votador ta Rey. Pero esaki solamente p’e dia di eleccion, segun Magaly Brito.

Te cu e dia aki, tur cos ta bon, e sonrisanan cu nos ta wordo ricibi ta hasta lagabo kere cu cos a drecha e momento ey mes. Tur loke cu ta keda priminti ta wordo lubida asina cu drenta gobernacion. Pero akinan ta nos mes ta faya.

Ta nos mester bringa pa cambia e cosnan ey cu ta robez!!!

Nos mester exigi na tur esnan cu kier yega na e stul ey di gobernacion pa no solamente duna un palabra cla, pero tambe cumplimento di esakinan.

 

Y for di e momento cu nos ta tende cu ki intencionnan tur kier bin goberna nos pais, para keto un rato riba kiko nos mes kier pa nos pais y si loke ta wordo proponi ta loke realmente nos tambe kier.

Nos mester mustra  tur hende cu e trahador kier adelanto, e trahador kier kibra cu e cadena ey di abuso y biba limita. Nos mester logra cada dia mas, cu condicionnan di trabao ta wordo mehora y cu esnan menos bin malo ta bira mihor !!

Trahador kier seguridad den su bida completo, den nos sociedad, na cas pero tambe den su empleo.  Esaki ta un necesidad humano basico.

E proteccion di e hende contra  adversidadnan di bida, accidente, enfermedad, desempleo, biehes y su consecuencianan amenazante p’e existencia humano tabata y lo ta preocupacionnan importante.

Democracia ta rekeri cu e trahador ta parti di decisión, parti di e seramento di e compromiso colectivo.

 

Segun Magaly Brito, e trahador tambe mester siña scucha bon loke ta wordo tira como intencionnan, paso loke awendia ta simplemente tira den laira, mañan ta bira e accionnan cu e trahador mes mester confronta.

Peor awor cu prioridad ta ser poni riba drecha presupuesto so den wowo di otro y otro ta pone riba un style di impone esta, loke cu e ta pensa so ta bay!!

 

PENSIOEN

E pensioen general tabata un comienzo cu mester keda traha riba dje. Algun aña atras a introduci e pensioen general pa trahadornan di Aruba. Principalmente p’esnan cu no tabatin un areglo di pensioen regla cu nan dunador di trabao. A base di e acuerdo esaki a yega su 3% di banda di e trahador y 3% di banda di e dunador di trabao.

E intencion nunca tabata pa para aki. Alcontrario !! E lucha mester sigi.

 

E 3% ey ta nada mes. Aunke e ta fastioso p’e trahador cu ta kita e 3% di su aporte n’e fondo, e dolor ta mas grandi mañan cu no tin areglo mes.

Ta pesey mester bin un lucha pa adelanto aki. Hunto cu e lucha pa mihor salario, mihor condicionnan laboral.

SEPPA ta desea tur trahador na Aruba, specialmente empleadonan publico y trahador di fundacionnan, un Feliz dia di Trahador!

Top