Sera conoci cu Frontline di Aruba su banda nobo 1OAK

Recientemente a keda conoci publicamente cu Aruba tin un banda musical nobo.

E agrupacion 1OAK lo ta uno cu lo toca ritmonan manera kizomba, salsa, merengue, ritmo combina, bachata, reggaeton y urban music.

 

Den e dianan nos dilanti lo tin un fiesta organisa pa asina e lansamento oficial di e banda 1OAK tuma lugar.

 

E conocido cantante Jurick Salomon a duna di conoce cu despues di a tuma e decision di bandona e agrupacion musical D’Licious, el a ricibi masha hopi reaccion for di su fanaticada cu a pidi’e pa no bandona e mundo musical.

 

Den palabra di e propio Jurick: “Den un combersacion cu colega artista Jurainy Luckert , cu porsierto ta un compañero di banda durante mi temporada na Hulanda, nos a cuminsa tira ideanan den halto y poco poco a cuminsa yega na algo concreto pa cuminsa traha algo chikito entre nos dos.

Un yamada a bira mas, acercamiento di amigonan interesa pa tambe forma parti di e idea/ proyecto aki, y sin por a premira esaki, den 2 dia nos a forma un banda di profesionalnan dispuesto pa deleita e pueblo aki cu musica y animacion yena di energia y positivismo.

Mi curason a yena di emocion di mira cuanto talento hoben y musiconan di caliber nos ilsa ta sigui produci, cu e gana di demostra cu ta nan tempo ta awo y cu nan ta cla pa presenta.”

 

E banda nobo 1OAK “ One of a Kind’ cu un concepto full diferente pa Aruba, ta conta cu cantantenan hoben cu hopi gana di traha den e proyecto, y di cual sigur ta priminti hopi pa destaca aki na Aruba.

Simplemente… One Of A Kind!

Manera e nomber mes ta bisa; unico den su estilo!

Leave a Reply

Top