Seramento di refineria cu BBO acumulativo y 28 miyon na huur pa famia

Lider di fraccion di AVP Marlon Sneek

 

“Ora cu scucha miembronan di MEP papia di drecha economia di pais Aruba, e ta mustra riba gritonan di desesperacion di politiconan cu ya no tin argumento pa gana confiansa bek di e pueblo di Aruba.

E solo hecho cu algun politico di MEP tin e curashi di bin dilanti y bisa cu bou Gobierno di AVP e desaroyo economico ta stanca, ta mustra cu e partido aki nunca tabatin nocion di loke nan mester a haci den 8 aña di gobernacion”, lider di fraccion di AVP, sr. Marlon Sneek ta splica.

 

“Ta increibel scucha e politiconan aki di MEP bin duna e impresion cu nan tin solucion pa un mihor desaroyo economico, lubidando por completo di con pueblo a manda e partido aki cas na mal forma.

Con e lider di MEP y su hendenan kier papia di economia, si ta Gabinete Nelson Oduber a opta pa laga Valero dal refineria sera, mandando cantidad di hende cas y perde cantidad di entrada cu  a bin destabilisa economia di nos isla grandemente.

Ta mesun Gobierno di MEP aki a dicidi di impone den oranan di anochi scur, un BBO acumulativo cu a manca pueblo, cu a manca economia di nos pais, pa cubri nan fracaso financiero cu nan a hinca nos pais den.

 

A caso politiconan di MEP a lubida e plan grandi di Gabinete Nelson Oduber di transforma centro di Oranjestad, den un centro di casino, di weganan di placa sin cu tabatin perspectiva positivo pa nos pais.

Un centro dado momento pa yuda amigo y famia cu placa di pueblo, a converti Oranjestad den un centro di adictonan ambulante sin perspectiva pa nan wordo yuda realmente.

Mester menciona tambe cu e vision di un economia stabiel di partido MEP y su lider, ta di vries indexering, vries vakantieuitkering, vries tur promocion y laga pueblo cu man bashi cu e presion grandi cu BBO di MEP a impone riba pueblo.

 

Con politiconan di MEP por papia di drecha economia di nos pais, si ta Gabinete Nelson Oduber a laga fondonan di pensioen na rand di bancarota, cu por poco a costa nos hendenan grandi nan entrada despues cu nan baha cu pensioen.

Politiconan di MEP ta pretende di drecha e situacion economico despues cu durante Gobierno di MEP, companianan crucero renombra a stop di bin Aruba, e compania aereo KLM a reduci su buelonan y hotelnan tabata confrontando problema p’e falta di vision di Gobierno di Nelson Oduber riba turismo.

 

E base futuro di cualkier economia di cualkier pa pais, ta sinta serca mucha- y hobennan di nos pais, pero ta bou Gobierno di MEP scolnan a cuminsa cay den otro, cura di scol benta abou, algun scol sin awa y sin otro necesidadnan, mientras cu for di 2009 Gobierno di AVP a percura pa drecha mas cu 80 scol rond Aruba.

Gobierno di AVP a dicidi di inverti den economia di Aruba, a percura pa ehecucion di proyectonan grandi cu Gobierno di MEP no a mira necesidad di ehecuta, pero a prefera di laga Aruba su economia yega na rand di un crisis grandi.

E vision economico di partido MEP tabata y lo keda un vision dirigi riba famia y amigonan di politiconan di MEP, un grupo previlegia cu si a conoce progreso economico, mientras cu pueblo tabata lucha pa mantene cabes riba awa.

Economia di pais Aruba den vision di MEP, no conoce bienestar y felicidad di nos pueblo, ya cu pueblo pa partido MEP, semper a bin na di dos lugar,” Parlamentario Marlon Sneek a señala.

Top