Serbionan a invadí Còrsou pa horta specialmente RBC

WILLEMSTAD – Den siglonan antaño Norwechinan tabata forma ehercitonan cu cual nan tabata baha for di nòrt di Europa pa invadi y esclavisá Europeonan cu tabata biba mas den sur di Europa.

Moronan tambe tabatin e mal custumber pa via Africa subi continente Europeo na Spaña y hòrta tur loke tabata bal la pena y violá mas tanto muher cu nan por a haña.

Awendia tin invasion moderno caminda for di Europa Oriental malhechornan ta bin cu avion pa bin practicá nan fechorianan na Corsou.

 

Ta masha remarcabel cu últimamente ciudadanonan Serbio ta biaha bin te Còrsou pa purba penetrá den e sistema bancario di principalmente Banco RBC pa via estafa elektronico saca placa for di e banco.

Siman pasa atrobe tabatin tres persona, esta Sorin Grigorescu (53 aña), Stanisa Stojanovic (43 aña) y Milan Rakic (33 aña) kendenan a bin purba nan suerte cu e banco aki.

Cada biaha cu mira fam y nòmbernan straño manera esnan aki pa presentá den Corte ta relacioná cu estafa electronico cu tarheta di credito y/of otro métodonan pa horta banco.

 

E trio ta acusá di a trata di penetrá den e sistema di e banco, haciendo uzo di documentonan falsificá.

Tratamento di e caso siman pasa tabata proforma y e defensa tabata na encargo di abogadonan mr. P. Janssen, mr. La Fleur y mr. M. Peelen.

 

Fiscal señora mr. Eva Bos a trece padilanti cu tratamento di e caso te n’e momentonan aki ta warda riba mas informacion di RBC y e Fiscal a sinti falta di representante di RBC.

Abogadonan a bin cu proposicionnan padilanti den e sentido cu por laga e acusadonan temporalmente den libertad pendiente di informacionnan cu lo mester drenta ainda y e hecho cu tratamento di e caso lo ta te dia 19 di janüari otro aña.

A observá cu lo por tuma nan pasaporte aden, laga nan paga un suma como bòrg etc., etc.

Den bista di Fiscal e tipo di decisionnan aki ta enserá cu e ta sacudi nos sistema di órden na Còrsou, pero pió ainda ta crea espacio pa huymento.

 

Huez finalmente a dicidí cu tratamentu di e caso ta continuá otro aña 19 di janüari, anto e Serbionan mester sinta trankil den SDKK warda e fecha di tratamento den sala di Corte. Esey ta enserá cu nan lo pasa dianan di fiesta di Pasco y Aña Nobo na Corsou, pero tras di trali.

Leave a Reply

Top