Sero Pita a yega na turno pa haya luz LED

Programa Luz den Bario ta un iniciativa di Prome Minister Mike Eman. A inicia cu e proyecto aki pasobra iluminacion ta un deseo di pueblo, di personanan cu ta biba 30 aña of mas biba den scuridad.

Durante bishita den e barionan ta scucha deseo di habitantenan y iluminacion tabata un di nan deseonan.

“Nos no ta scucha e habitantenan y hinca papel den lachi, pero ta cumpli cu nan deseonan,” Ruth Tromp Schoop, Director di Departamento Servicio pa Comunidad y Bario a bisa.

 

Diahuebs anochi, despues di e bishita durante dia, tabatin sendemento di luz den un area di Sero Pita cu pa hopi aña a biba den un bario scur. Presente tabata Director di Servicio pa Comunidad y Bario, Ruth Tromp Schoop, kende a splica cu desde cu 2010 e team ta bishita bario y analisa cual t’e necesidadnan.

“Poco-poco pero sigur nos ta yenando e deseonan cu pueblo tin. Pesey awe nos ta den Sero Pita, un bario cu practicamente no tabatin luz.”

 

Tromp a splica cu ta haci un evaluacion di tur e peticionnan y asina ta haci un escogencia cua ta e bario cu ta bay prome pa haya luz. Pero na final ta tur bario den scuridad mester haya luz.

“Nos ta contento di yega na Sero Pita. Mi por bisa cu nos ta trata di haci un balance, poniendo na un parti na Noord, despues Santa Cruz y San Nicolas.

E ta duna nos un satisfaccion hopi grandi na nos cu ta cumpli cu comunidad. Pero e habitante tambe ta mira cu nos no a bin solamente pa analisa, scirbi y hinca papel den lessenaar. No.

Nos ta cumpli cu nan deseonan y ta sigui poco-poco pero sigur yenando e deseonan cu e habitantenan di 2010 pa aworaki.”

 

Poppy Monte ta un ciudadano y habitante di Sero Pita feliz desde diahuebs anochi. E tabata presente na momento cu Minister di Asunto Economico Richard Arends a sende e prome luz den e area ey di Sero Pita unda no tabatin luz.

“E momento aki ta hopi special, pasobra e ta un oracion contesta pa trece claridad den e bario di Sero Pita y sigui pone luz den tur bario di Aruba. Mi ta satisfecho y contento,” sra. Poppy Monte a bisa.

Top