Seso Sport na Club Primavera!

Diasabra awor, 1 di april, cuminsando pa 8’or di anochi, e tan spera anochi di Scucha, Pensa, y Contesta lo rementa cu tur su forsa na Club Portugues na Primavera! E prome Seso Sport di 2017! Club Primavera lo habri otro aña mas di e Seso Sport mas duro di Aruba, caminda niun cerebro lo wordo “gespaar”!

 

P’e evento aki directiva a pone tur snack bebida di e bar bon surti na prijs di 1 florin pa uno!

E famoso spetada lo ta na benta pa solamente 2,50 pa kilo! E doorprice lo ta un roundtrip pa Miami pa full un team, incluyendo $1,000.00 zakgeld pa cada miembro di e team!

Claro cu e grandioso premionan no por keda atras tampoco. E prome premio lo ta un gira di dos siman full paga dor di continente Asiatico, cuminsando na Tokyo, Japan y terminando na Bangkok Thailand, incluyendo $5,000.00 zakgeld pa cada miembro di team ganador!

Di dos premio lo ta un trip cu crusero na Alaska pa cada miembro di team cu sali na segundo luga! Shonnan algo nunca bisto den mundo di Seso Sport aki na Aruba!

 

Inscripcion lo cuminsa desde 7’or y mey di anochi na Club Primavera, y ta pidi tur participante pa t’ey na tempo p’asina e grandioso anochi aki por start na tempo pa 8’or.

Por cuminsa reserva di awor na Whatsapp 564-9838, ya cu ta bay spera basta di e teamnan famoso lo bin competi p’e premio fabuloso nan aki!

 

Tin rumores ta core rond cu e famoso team di The Saints a haya refuerso di algun miembro cu lo tabata den exterior. Tin papia cu e sensacion di semper, esta Hoffi Prikichi, lo a bay tene un workshop na Moscu con pa hack e preguntanan. Tambe ultima ora nos a bin haya sa cu directiva di club a pone un scanner na porta cu ta detecta smartphone scondi cu ta wordo husa pa “Google” contestanan “live” durante competencia!

 

Shonan, e prome Seso Sport di Club Portugues ta mustra di ta bay ta rand rand y super hot!

Bo sa cua tabata e prome capital di Gran Colombia? Bo sa cua paisnan ne continente Africano no tin costa? Bo sa kico ta “peristaltiek”? Nooo??? Wel yega Diasabra awor, 1 di april, pa 8’or di anochi na Club Primavera pa presencia e prome anochi di Seso Sport Scucha, Pensa, y Contesta 2017!

Por ultimo directiva di club kier a participa cu mirando e fecha special di e evento, algun prijs di producto, of balor di premionan anunsia, por ta suheto na cambionan di ultima ora!

Top