Shailiny Tromp-Lee di MEP: Dia di Betico ta un dia pa celebra y reflexiona pakico nos ta yama Betico “Nos Libertador”

Rib’e dia aki, nos como mayor, educador y Gobierno en particular, tin e deber di pone enfasis rib’e logronan y muy en especial, duna atencion na e lucha cu e Arkitecto y realisador di nos Status Aparte a hiba, pa awe nos ta liber den nos propio cas.

Betico tabata un politico cu semper tabata corda riba su pueblo na prome luga. Un homber orguyoso di tabata yiu di e pueblo aki. Cu un don special pa destila e anhelo di e pueblo pa libertad na diferente manera cu un solo meta: realisacion di esaki!

 

Betico a keda golpia, cera y tira pa e solo motibo cu el a hiba lidersago di e partido cu a hiba e lucha di e pueblo aki pa libertad den e fase di realisacion, esta Movimiento Electoral di Pueblo.

E tabata un lucha largo, un lucha cu a laga su marcanan atras, un lucha cu a laga su cicatrisnan atras y aunke cu ultimo añanan nan kier tapa nan cu ‘cirugia plastico’ y falsificacion di historia. Mi ta convenci cu loke tin na documentacion, ta mas cu suficiente pa mantene e historia di su logro y lucha berdadero bibo.

 

Betico semper a carga fe y confiansa den e mentalidad y caracter di e pueblo aki y tabata consciente cu hunto y uni bo ta logra! Betico tabata sa cu pa logra cu e pueblo ta para hunto cu ne den e lucha, e mester bin cu simbolonan cu lo crea union y lo hisa e sentimentonan di patriotismo.

Pa e motibo aki el a percura pa introduci un himno y un bandera. Alabes a duna hopi atencion na cultura di Aruba y a bin cu un organo pa percura pa maneho y cuido di esaki. Dor di crea union den pueblo, no obstante diferencianan di opinion riba otro terenonan, Aruba completo a para pa e lucha pa nos libertad. Un pueblo cu un meta en comun, un meta nacional, libertad y mayor felicidad pa un y tur y e futuro generacionnan.

 

Dia di Betico ta un refleho di e strategia cu Betico a usa pa logra su meta. Dicon mi ta bisa esey?

Dia di Betico famianan ta subi caminda pa celebra. E ta un dia di fiesta nacional. Un dia cu ta crea union, patriotismo, orguyo y asina mi por sigui menciona. Diferencianan di opinion ta keda hala un banda pa rindi honor na Nos Libertador. Un dia cu mi ta convenci ta haci Nos Libertador, aya, na cielo, hopi feliz.

 

Manera cualkier yiu ta orguyoso di logronan di su mayornan, ta usa esakinan como ehempel, ta saca motivacion di nan y semper lo percura pa nan no keda lubida. Ami como miembro di Movimiento Electoral di Pueblo, e partido di Nos Libertador, ta orguyoso di e legado cu el a laga atras.

Un fuente di inspiracion y motivacion continuo. Aunke tin ta vocifera cu mester stop di usa Betico den nos mensahe, ami ta subraya e hecho cu esaki ta a base di ignorancia of intimidacion.

Ta nos deber pa keda recorda y acentua e importancia di su lucha y logronan pa Aruba, pa bo, pa nos yiunan y futuro generacionnan, dor di demostra pa medio di accion y hecho, cu nos ta compronde y sigui su lucha. Mustrando mesun inovacion y astucia politico cu nos lider a sa di demostra.

 

Riba Dia di Betico nos mester bati riba nos pecho, nos mester alsa nos voz y bisa: ‘Danki na dj’e nos tin nos propio himno y bandera, nos Status Aparte, nos Parlamento/Gobierno, nos moneda, nos Banco Central…nos ta baas den nos mesun cas!

 

Dia 25 di januari venidero, Dia di Betico, laga nos tur hisa nos bandera, bisti nos t-shirt y asisti na e diferente actividad riba nos isla. Nos di MEP lo tin un celebacion grandi dia 24 di januari na Cede di MEP na Savaneta dilanti Wintergarden di 6:00pm – 12:00pm. Nos ta invita pueblo henter pa bin celebra hunto cu nos den ambiente di TBS Brassband, Tsunami, Buleria y Jeon. Nos ta wardabo!

Top